हाफिज सईदचा साथीदार अबू कतालची पाकिस्तानात गोळ्या घालून हत्या

लष्कर ए तोयबाचा दहशदवादी आणि हाफिज सईदचा विश्वासू सहकारी अबू कतालची पाकिस्तानात गोळ्या घालून हत्या करण्यात आली आहे. जम्मू कश्मीरमधल्या मोठ्या दहशतवादी हल्ल्यांमध्ये अबू कतालचा सहभाग होता.

सुत्रांनी दिलेल्या माहितीनुसार पाकिस्तानमधील झेलम परिसरात कताल आपल्या सुरक्षा रक्षकासोबत प्रवास करत होता तेव्हा अज्ञात हल्लेखोरांनी अंदाधुंद गोळीबार केला. त्यावेळी हाफिज सईद देखील त्याच्याबरोबर होता. दरम्यान, या हल्ल्यानंतर हाफिज सईदने तिथून पळ काढला. तेव्हापासून तो बेपत्ता आहे.

झेलम परिसरातील दिना पंजाब विद्यापीठाजवळील झीनत हॉटेलजवळ हा हल्ला झाला. या हल्ल्यात अबू कताल आणि त्याचा एक सुरक्षा रक्षक जागीच ठार झाले. आणि एक सुरक्षा रक्षक गंभीर जखमी झाला आहे.

26/11 मुंबई दहशतवादी हल्ल्याचा सूत्रधार हाफिज सईदचा जवळचा सहकारी अबू कताल हा 9 जून रोजी जम्मू आणि काश्मीरच्या रियासी जिल्ह्यातील शिव खोरी मंदिरातून परतणाऱ्या यात्रेकरूंच्या बसवर झालेल्या हल्ल्याचा मास्टर माईंड होता. तसेच हाफिज सईदनेच अबू कतालला लष्कराचा मुख्य ऑपरेशनल कमांडर म्हणून देखील नियुक्त केले होते.