पावसामुळे मंदिरावर झाड कोसळले, 6 जणांचा मृत्यू; 8 गंभीर जखमी

बिहारमधील नालंदा जिल्ह्याला वादळीवारा आणि मुसळधार पावसाने झोडपून काढले. अचानक पाऊस सुरू झाल्याने नागरिकांनी मंदिरात आसरा घेतला. यादरम्यान वादळामुळे मंदिरावर झाड कोसळले आणि ढिगाऱ्याखाली दबून सहा जणांचा मृत्यू झाला. अन्य आठ जण गंभीर जखमी झाले आहेत. जखमींना उपचारासाठी रुग्णालयात दाखल करण्यात आले आहे.

नालंदा जिल्ह्यातील सदर प्रखंड येथील नगवा गावात ही घटना घडली. जिल्ह्यात गुरुवारी अवकाळी पावसाने थैमान घातले. पावसापासून बचाव करण्यासाठी 12 ते 15 जण जवळच असलेल्या देवीच्या मंदिरात शिरले. याचदरम्यान वादळी पावसामुळे मंदिरावर झाड कोसळल्याने मंदिराची भिंत कोसळली.

भिंत अंगावर पडल्याने नागरिक ढिगाऱ्याखाली दबले. घटना घडताच स्थानिकांनी तात्काळ घटनास्थळी धाव घेत बचावकार्य सुरू केले. घटनेची माहिती मिळताच स्थानिक प्रशासन आणि पोलीस घटनास्थळी दाखल झाले. दरम्यान गुरुवारी बिहारमधील विविध जिल्ह्यांमध्ये वीज कोसळून आणि पावसामुळे एकूण 25 लोकांचा मृत्यू झाला आहे.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.