कश्मीरमधील पहलगाममध्ये पर्यटकांवर हल्ला करणाऱ्या दोन दहशतवाद्यांचे फोटो समोर आले आहेत. पुण्यातील एका पर्यटकाच्या मोबाईलमध्ये हे दोघे दहशतवादी कैद झाले आहेत. हे फोटो आणि व्हिडिओ एनआयकडे सुपूर्द करण्यात आले आहेत. एनआयएकडून या फोटो आणि व्हिडिओची तपासणी सुरू आहे.
मावळ तालुक्यातील देहूरोड येथील रहिवासी श्रीजीत रमेशन हे 18 एप्रिल रोजी कुटुंबासोबत कश्मीरमध्ये पर्यटनासाठी गेले होते. पहलगामपासून साडे सात किमी अंतरावर असलेल्या बेताब व्हॅलीमध्ये श्रीजीत आपल्या मुलीची रील्स बनवत होते. रील्स शूट करत असताना मुलीच्या मागून दोन संशयित दहशतवादी जाताना कैद झाले आहेत, अशी माहिती श्रीजीत यांनी दिली.
रमेशन कुटुंबीय कश्मीर सहलीवरून सुखरुप घरी परतले. यानंतर 22 एप्रिल रोजी पहलगाममध्ये पर्यटकांवर दहशतवाद्यांकडून हल्ला झाला. यानंतर टीव्हीवर संशयित दहशतवाद्यांचे फोटो प्रसारीत झाले. फोटो पाहिल्यानंतर यातील दोघे जण आपल्या रील्समध्ये शूट झाल्याचे श्रीजीत यांच्या लक्षात आले. यानंतर त्यांनी पहलगाम, बेताब व्हॅली येथे शूट केलेल्या सर्व रील्स, फोटो तपासले. टीव्हीवरील फोटो आणि श्रीजीत यांच्या मोबाईलमध्ये कैद झालेल्या दहशतवाद्यांचे फोटो जुळत होते, असे श्रीजीत म्हणाले.
यानंतर श्रीजीत यांनी तात्काळ दिल्लीतील एनआयएच्या अधिकाऱ्यांना फोन करून याबाबत माहिती दिली. तसेच सर्व फोटो आणि व्हिडिओ त्यांच्याकडे सुपूर्द केले. एनआयएकडून याबाबत पुढील तपास सुरू आहे.
Comment List