मुंबईत अंधेरीच्या लोखंडवाला परिसरात एका इमारतीला भीषण आग लागल्याची घटना शुक्रवारी मध्यरात्री घडली. या अपघातात एका महिलेचा मृत्यू झाला तर सहाजण जखमी झाले. जखमींमध्ये एका 10 दिवसांच्या बाळासह एका लहान मुलाचाही समावेश आहे.
मिळेलेल्या माहितीनुसार, लोखंडवाला परिसरातील अशोक अॅकॅडमी लेनमधील आठ मजली इमारतीच्या पहिल्या मजल्यावरील एका घरात अचानक आग लागली. ही घटना मध्यरात्री पावणे तीनच्या सुमारास घडली. त्यामुळे घरातील सर्वजण साखर झोपेत होते. त्यामुळे आग लागल्याचे कोणालाही समजले नाही. ही आग इतकी भीषण होती की काही वेळातच आगीने रौद्ररूप धारण केले. त्यामुळे संपूर्ण घरात धुराचे लोट पसरले. घरातील लोकांना जाग आली आणि आग लागल्याचे समजताच रहिवाशांनी घरातून बाहेर पडण्याचा प्रयत्न केला.
दरम्यान, या आगीतून काही जण बचावले. मात्र, काहीजणांना धुरामुळे बाहेर पडणे जमले नाही. या घटनेची माहितीमिळताच अग्निशमन दलाचे जवान तात्काळ घटनास्थळी पोहोचले आणि त्यांनी बचाव कार्य सुरू केले. यावेळी त्यांनी अनेक प्रयत्नांनी घरातील लोकांना बाहेर काढले. मात्र, बराच वेळ धुरात असल्यामुळे त्यांना श्वास घेण्यास त्रास होत होता. त्यामुळे जखमींना तातडीने जवळच्या रुग्णालयात दाखल केले. पण उपचारादरम्यान अभिना संजय वालिया या महिलेचा मृत्यू झाला. तर अन्य जखमींवर अद्यापही रुग्णालयात उपचार सुरू आहेत. या आगीचे कारण अद्याप स्पष्ट झालेले नाही.
Comment List