भरधाव कारने पार्किंग अटेंडंटला चिरडल्याची घटना वांद्रे कुर्ला कॉम्प्लेक्स (BKC) येथे घडली. या अपघातात पार्किंग अटेंडंटचा दुर्दैवी मृत्यू झाला. याप्रकरणी पोलिसांनी आरोपी कार चालकाला अटक केली आहे. प्रबोधन बेलेकर असे अटक आरोपीचे नाव आहे. तर विजय शुक्ला असे मयत पार्किंग अटेंडंटचे नाव आहे.
वांद्रे पूर्व येथील इन्सिग्निया इमारतीच्या पार्किंगमध्ये ही घटना घडली. विजय शुक्ला आपल्या अन्य तीन सहकाऱ्यांसह पार्किंगमधील खोलीत राहत होता. या इमारतीमध्ये बृहन्मुंबई महानगरपालिकेकडून भाडेतत्त्वावर ओम साई सिद्धी कंपनीद्वारे पे-अँड-पार्क तत्त्वावर चालविली जाते.
शुक्ला गुरुवारी रात्रीच्या सुमारास वाहनांच्या नोंदी करणे आणि वाहनांचे शुल्क वसूल करण्याचे नियमित काम करत होता. यादरम्यान आरोपी बेलेकर हा आपली गाडी पार्किंगमधून बाहेर काढत असताना त्याचे वाहनावरील नियंत्रण सुटले. यानंतर कारने आधी शुक्लाला जोरदार धडक दिली, मग भिंतीवर आदळली.
या अपघातात शुक्ला गंभीर जखमी झाला. सहकाऱ्यांनी तात्काळ शुक्लाला रुग्णालयात दाखल नेले. मात्र उपचारादरम्यान शुक्लाचा मृत्यू झाला. घटनेची माहिती मिळताच बीकेसी पोलिसांनी घटनास्थळ गाठून अकस्मात मृत्यूची नोंद केली. याप्रकरणी शुक्लाचा सहकारी राहुल सिंग याच्या तक्रारीच्या आधारे पोलिसांनी गुन्हा दाखल केला. पोलिसांनी कार चालक बेलेकर याला अटक केली आहे. बेलेकर हा वरळीचा रहिवासी आहे. पुढील तपास पोलीस करत आहे.
Comment List