पुण्यात लुटमारीचा ‘दे धक्का’ पॅटर्न, पादचाऱ्यांना धक्का मारून पाया पडण्याचे नाटक; दोघांना अटक

रस्त्याने पायी जाणाऱ्या नागरिकांना मुद्दामहून धक्का मारून त्यांच्या पाया पडण्याचे नाटक करीत खिशातील पैसे चोरणाऱ्या दोघा सराईतांना सहकारनगर पोलिसांनी अटक केली आहे. आरोपींकडून दुचाकी जप्त करण्यात आली असून, त्यांनी अशाप्रकारे कोणत्या ठिकाणी गुन्हे केले आहेत का, याबाबतची माहिती पोलिसांकडून घेतली जात आहे. अस्लम इस्माइल शेख (वय – 21, रा. बिल्डिंग नं. 1, फ्लॅट नं. 206, नवीन म्हाडा, सातवाडी, हडपसर) आणि साद अकबर पठाण (वय – 23, रा. गल्ली क्र. 7 ए वेस्टर्न बेकरी गल्ली, सय्यदनगर, हडपसर) अशी अटक केलेल्यांची नावे आहेत.

तक्रारदार हे 9 एप्रिलला धनकवडीतील शाहू बँक चौकातून पायी चालले होते. त्या वेळी दुचाकीवर आलेल्या दोघा चोरट्यांनी त्यांना विनाकारण धक्का मारला. त्यानंतर गाडी थांबवून दोघांनी तक्रारदाराला आमची चूक झाली, माफ करा असे म्हणत पाया पडण्याचा बहाणा केला. त्यानंतर दोघांपैकी एका चोरट्याने तक्रारदाराच्या खिशातून 30 हजारांची रोकड चोरून नेली. रक्कम खिशात नसल्याचे लक्षात येताच, तक्रारदाराने सहकारनगर पोलीस ठाणे गाठून फिर्याद दाखल केली. त्यानुसार पोलिसांनी 136/2025 भारतीय न्याय संहिता 2023 चे कलम 303 (2), 3(5) अन्वये गुन्हा दाखल केला.

गुन्हयाच्या अनुषंगाने सहकारनगर पोलीस ठाण्याचे वरिष्ठ पोलीस निरीक्षक राहुल गौड, पोलीस निरीक्षक सुरेखा चव्हाण यांच्या मार्गदर्शनाखाली तपास पथकातील सहायक पोलीस निरीक्षक सागर पाटील यांनी पथकासह घटनास्थळी धाव घेतली. सीसीटीव्ही फुटेजच्या मदतीने आरोपींनी वापरलेल्या दुचाकी क्रमांकावरून वाहन मालकाची माहिती मिळविली. त्यानुसार ही चोरी सराईत अस्लम शेख आणि साद पठाण यांनी केल्याचे उघडकीस आले. त्यानुसार पथकाने त्यांना ताब्यात घेऊन चौकशी केली. त्या वेळी दोघांनी गुन्ह्याची कबुली दिली.

ही कामगिरी अपर पोलीस आयुक्त प्रवीणकुमार पाटील, उपायुक्त स्मार्तना पाटील, एसीपी राहुल आवारे, वरिष्ठ पोलीस निरीक्षक राहुल गौड यांच्या मार्गदर्शनाखाली पथकाने केली.