कोथरुड परिसरात उभा राहणार दुमजली उड्डाणपूल, महामेट्रोकडून बनविण्यात येणाऱ्या पुलाचा खर्च महापालिका उचलणार

पुणे शहरात वाहतूककोंडीचा प्रश्न दिवसेंदिवस गंभीर होत चालला असून कोथरूड, पौड रस्ता आणि चांदणी चौक या भागांमध्ये सकाळ-संध्याकाळच्या वेळेत मोठ्या प्रमाणावर वाहतुकीचा ताण असतो. या पार्श्वभूमीवर पुणे महापालिका आणि महामेट्रोकडून वनाज ते चांदणी चौक या मेट्रो मार्गाच्या विस्तारीकरणासोबतच कोथरूड परिसरात पौड रस्त्यावर एक नवा दुमजली उड्डाणपूल उभारण्यात येणार आहे. हा दुमजली उड्डाणपूल पौड रस्त्यावर कचरा डेपो-टीव्हीएस शोरूमपासून लोहिया आयटी पार्कपर्यंत उभारण्यात येणार आहे. महामेट्रोने याबाबतचा आराखडा पुणे महापालिकेला सादर केला आहे. या प्रकल्पासाठी अंदाजे 90 कोटी रुपयांचा खर्च अपेक्षित आहे. पालिकेकडून या प्रस्तावावर विस्तृत अभ्यास करून योग्य ते बदल सुचवून पुढील कार्यवाही केली जाणार आहे.

कोथरूड हे पुण्याचे पश्चिम प्रवेशद्वार असून, इथे दररोज हजारो वाहनांची वर्दळ असते. कोथरूड डेपो परिसर, नळस्टॉप, लोहिया आयटी पार्क या ठिकाणी नागरिकांना मोठ्या प्रमाणावर वाहतूककोंडीला सामोरे जावे लागते. या उड्डाणपुलाच्या माध्यमातून वाहनांची सततची गर्दी कमी होण्याची शक्यता आहे. हा पूल नळस्टॉप येथे उभारण्यात आलेल्या उडाणपुलाच्या धर्तीवर उभारण्यात येणार आहे. सध्या वनाज ते चांदणी चौक मेट्रो रूटचा प्रस्ताव केंद्राकडे असून अंतिम टप्प्यात आहे. त्यामुळे या मार्गाला मंजुरी मिळाल्यानंतर उड्डाणपुलाचे कार्यदेखील लगेच सुरू होणार आहे.

पालिकेच्या प्रकल्प विभागाचे मुख्य अभियंता युवराज देशमुख म्हणाले, महामेट्रोकडून प्रस्तावित दुमजली उड्डाणपुलाचा आराखडा मिळाला आहे. अत्यंत रहदारीच्या या रस्त्यावरील वाहतूककोंडी सोडविण्यासाठी या पुलाचा उपयोग होणार आहे. पालिकेकडून आराखड्यावर अभ्यास करून अपेक्षित बदल सुचविले जातील. त्यानंतर पुढील कार्यवाही केली जाईल. उड्डाणपुलाचा खर्च पालिकेतर्फे केला जाणार आहे.

शहरातील तिसरा दुमजली उड्डाणपूल

• नळस्टॉप येथे महामेट्रोने उड्डाणपूल बनविला आहे. पुणे विद्यापीठ चौकामध्येदेखील दुमजली पुलाचे काम सुरू आहे. या दोन्ही पुलांवर सर्वांत वर मेट्रो धावणार असून त्याखालील पूल वाहनांच्या वाहतुकीसाठी उपलब्ध असणार आहे. या दोन दुमजली पुलांनंतर आता पौड रस्त्यावर शहरातील तिसरा दुमजली उड्डाणपूल बनविण्याची तयारी सुरू करण्यात आली आहे.
• उड्डाणपुलाची एकूण लांबी 715 मीटर, रुंदी 14 मीटर (प्रत्येकी 2-2 लेन), अंदाजे खर्च 90 कोटी रुपये. सर्वांत वरील पूल मेट्रोसाठी, त्याखालील पूल वाहनांसाठी असणार आहे.