महायुती सरकारमधील नाराजी काही जाता जाईना. या नाराजीमुळे आधी मुख्यमंत्री ठरवायला उशीर झाला. नंतर खातेवाटप बऱ्याच विलंबाने झाले. शपथविधीचा मुहूर्तही लवकर सापडला नव्हता. आता शपथविधी होऊन 17 दिवस उलटले तरी 9 मंत्र्यांनी अद्याप पदभार स्वीकारलेला नाही. काही कमी दर्जाचे खाते मिळाल्याने तर काही आवडीचे दालन न मिळाल्याने नाराज असल्याचे सांगितले जाते. मंत्र्यांच्या या नाराजीने मुख्यमंत्री देवेंद्र फडणवीस यांच्या नाकीनऊ आणले असून लाड खपवून घेतले जाणार नाहीत, तत्काळ पदभार स्वीकारा, असे आदेशच त्यांनी संबंधित मंत्र्यांना दिले आहेत.
नऊ मंत्र्यांनी अजून स्वीकारला नाही पदभार
पदभार न स्वीकारलेल्या मंत्र्यांमध्ये 6 कॅबिनेट तर 3 राज्यमंत्र्यांचा समावेश आहे. पाणीपुरवठा मंत्री गुलाबराव पाटील, दुग्धविकास मंत्री अतुल सावे, उद्योग मंत्री उदय सामंत, आरोग्य मंत्री प्रकाश आबिटकर, क्रीडा मंत्री दत्ता भरणे, रोजगार हमी मंत्री भरत गोगावले या कॅबिनेट मंत्र्यांसह माधुरी मिसाळ (सामाजिक न्याय), आशीष जयस्वाल (अर्थ व नियोजन) आणि योगेश कदम (गृह) या राज्यमंत्र्यांनी अद्याप पदभार स्वीकारलेला नाही.
हिवाळी अधिवेशनाच्या तोंडावरच महायुती सरकारचा मंत्रिमंडळ विस्तार झाला. नव्या मंत्र्यांचा शपथविधीही नागपूरमध्येच केला गेला. 21 तारखेला अधिवेशन संस्थगित झाल्यानंतर मुंबईत मंत्र्यांच्या दालने वाटपावरून रुसवेफुगवे दिसून आले. आता दालने वाटप होऊनही 9 मंत्र्यांनी पदभार स्वीकारलेला नाही. त्यामुळे संबंधित खात्यांचे काम पूर्ण गतीने सुरू झालेले नाही. मंत्र्यांच्या या नाराजीमुळे मुख्यमंत्री फडणवीस यांचा संताप झाला आहे. त्यामुळेच तत्काळ पदभार स्वीकारण्याचे फर्मानच त्यांनी काढल्याचे कळते.
दुखवट्यामुळे थांबलोय
देशाचे माजी पंतप्रधान डॉ. मनमोहन सिंग यांच्या निधनामुळे सात दिवसांचा दुखवटा जाहीर करण्यात आला. तो दुखवटय़ाचा कालावधी 2 तारखेला संपत असून त्यानंतर सर्व मंत्री पदभार स्वीकारताना दिसतील, असा दावा क्रीडा मंत्री दत्ता भरणे यांनी केला.
Comment List