चोरीला गेलेला ऐवज पोलिसांनी परत मिळवून दिला! 86 लाख 62हजार रुपयांचा मुद्देमाल परत केला

एखादा ऐवज चोरीला गेला किंवा सायबर भामटय़ांनी फसवले की परत ते मिळेल असा विचारही केला जात नाही. परंतु परिमंडळ-8 अंतर्गत येणाऱ्या पोलिसांनी नागरिकांचा हा समज खोटा ठरवला आहे. पोलिसांनी शेकडो नागरिकांचा चोरीला गेलेला ऐवज तसेच ऑनलाईन झालेल्या आर्थिक फसवणुकीची व रक्कम असा तब्बल 86 लाख 64 हजार रुपयांचा मुद्देमाल परत केला आहे.

सोनसाखळी, मोबाईल आदी ऐवज चोरीला गेला, सायबर भामटय़ांनी ऑनलाईन फसवणूक केली असे गुन्हे वाढले होते. याची गंभीर दखल घेत उपायुक्त मनीष कलवानिया यांच्या मार्गदर्शनाखाली परिमंडळ-8 अंतर्गत येणाऱ्या सर्व पोलीस ठाण्याचे वरिष्ठ निरीक्षक व पथकाने त्यांच्याकडे दाखल गुह्यांची उकल करत तब्बल 68 लाख 38 हजार रुपयांचा ऐवज शोधून आणला. शिवाय सायबर भामटय़ांनी फसवणूक केलेली 18 लाख 24 हजार रुपयांची रक्कम परत मिळवली. हा सर्व मुद्देमाल आज पोलिसांकडून संबंधितांना परत करण्यात आला. पोलिसांनी आज आम्हाला सुखद धक्काच दिला. आमचा चोरीला आणि फसवणूक झालेली रक्कम, ऐवज परत मिळेल असे वाटलेही नव्हते. आम्ही त्यावर पाणी सोडले होते, पण पोलिसांनी ते परत मिळवून आम्हाला देण्याचे काम केले. यातून पोलिसांप्रति अविश्वास दाखवणे चूक आहे, याची प्रचीती आम्हाला आल्याचे नागरिकांनी सांगितले.