Weight Loss- वजन कमी करण्यासाठी खा कमी कॅलरीयुक्त पदार्थ! भूक कमी लागेल, वजनही नियंत्रणात राहील

आजच्या काळात लठ्ठपणा ही एक गंभीर समस्या बनली आहे. यामुळे बहुतेक लोक त्रस्त झालेले आहेत. वाढलेले वजन केवळ वाईट दिसत नाही तर, यामुळे आरोग्याच्या तक्रारी देखील मोठ्या प्रमाणात सुरु होतात. वाढत्या वजनामुळे मधुमेह, उच्च रक्तदाब आणि हृदयरोग यांसारख्या अनेक गंभीर आजारांचा धोका वाढतो. वजन नियंत्रित करण्यासाठी व्यायामासोबतच निरोगी आहार घेणे खूप महत्वाचे आहे. कितीही व्यायाम केला तरी, आहाराची काळजी घेतली नाही तर तुमचे वजन कमी होणार नाही. खरंतर, जेव्हा आपण शरीराच्या गरजेपेक्षा जास्त कॅलरीज वापरतो तेव्हा अतिरिक्त कॅलरीज शरीरात चरबीच्या रूपात साठवल्या जातात.

वजन कमी करण्यासाठी कमी कॅलरीयुक्त पदार्थ

दही
दही हा कमी कॅलरीज असलेला एक चांगला पर्याय आहे. हे प्रथिनांचा एक उत्तम स्रोत आहे. यामुळे पोट बराच काळ भरलेले राहते. तसेच दह्यामुळे आपली साखर खाण्याची इच्छा देखील नियंत्रणात राहते. वजन कमी करायचे असेल तर आहारात साधे दही खायलाच हवे.

 

अंडी
वजन कमी करण्यासाठी अंडी खाणे खूप फायदेशीर मानले जाते. त्यात प्रथिने भरपूर असतात आणि कॅलरीज खूप कमी असतात. नाश्त्यात अंडी खाल्ल्याने पोट बराच वेळ भरलेले राहते आणि तुम्हाला वारंवार भूक लागत नाही. हे तुम्हाला आवश्यकतेपेक्षा जास्त खाण्यापासून रोखते आणि वजन कमी करण्यास मदत करते. तुम्ही उकडलेले अंडे खाऊ शकता किंवा अंड्याचे ऑम्लेट किंवा भुर्जी बनवूनही खाऊ शकता.

सफरचंद
दररोज एक सफरचंद खाल्ल्याने आजारांपासून दूर राहाल. शिवाय वजनही नियंत्रित राहील. त्यात कॅलरीजचे प्रमाण खूप कमी असते, त्यामुळे ते वजन कमी करण्यास उपयुक्त ठरते. 100 ग्रॅम सफरचंदात अंदाजे ५० कॅलरीज असतात. त्यात फायबर असते, जे पोट बराच काळ भरलेले ठेवते. त्यामध्ये असलेले पेक्टिन चरबी जाळण्यास मदत करते.

ओट्स
वजन कमी करू इच्छिणाऱ्यांसाठी ओट्सचे सेवन करणे खूप फायदेशीर आहे. अर्धा कप ओट्समध्ये फक्त 154 कॅलरीज आढळतात. यामध्ये भरपूर फायबर असते, जे भूक नियंत्रित करण्यास मदत करते. नाश्त्यात एक वाटी ओट्स खाल्ल्याने तुमचे पोट बराच वेळ भरलेले राहील आणि वजन कमी होण्यास मदत होईल. ओट्स अधिक पौष्टिक बनवण्यासाठी, तुम्ही त्यात हिरव्या भाज्या घालून ते शिजवू शकता.

काकडी
उन्हाळ्यात काकडी खूप खाल्ली जाते. त्यात भरपूर पाणी असते, त्यामुळे ते डिहायड्रेशन आणि उष्माघातापासून संरक्षण करते. काकडी खाल्ल्याने वजन कमी होण्यास मदत होते. 100 ग्रॅम काकडीत फक्त 16 कॅलरीज आढळतात. हे खाल्ल्याने तुमचे पोट लवकर भरते आणि तुम्ही जास्त खाण्यापासून वाचता.

(कोणतेही उपाय करण्याआधी तज्ज्ञांचा सल्ला अवश्य घ्यावा.)