आता ठाणे ग्रामीणच्या गुन्हेगारीवर वॉच ठेवला जाणार आहे. ११ पोलीस ठाण्याच्या हद्दीतील गर्दीची ठिकाणे, धार्मिक स्थळे, शाळा आणि सरकारी आस्थापना येथील बाराशे सीसीटीव्ही कॅमेरे कंट्रोल रूममध्ये जोडले आहे. त्यामुळे आता गुन्हेगारांची काही खैर नाही. महिला सुरक्षा, वाहतूककोंडी आणि संशयास्पद हालचालींवर लक्ष ठेवण्यासाठी या कंट्रोल रूमची मदत होणार आहे.
ठाणे ग्रामीण पोलिसांनी ‘एक सीसीटीव्ही आपल्या सुरक्षिततेसाठी’ हा उपक्रम हाती घेतला. या उपक्रमाच्या माध्यमातून पोलिसांनी सीसीटीव्ही कॅमेरे बसवलेल्या खासगी व शासकीय आस्थापनांची भेट घेतली. यावेळी ११ पोलीस ठाण्याच्या हद्दीत एकूण ४ हजार ५०० कॅमेऱ्यांची यादी तयार करण्यात आली असून त्यात इंटरनेटद्वारे जोडलेल्या जवळपास बाराशे कॅमेऱ्यांचे पोलिसांनी थेट कंट्रोल रूममध्ये अॅक्सेस घेतले आहेत.
कॅमेऱ्यांवर वॉच ठेवण्यासाठी पोलिसांनी १५ प्रशिक्षित कर्मचाऱ्यांची नियुक्ती केली असून हे कर्मचारी २४ तास कार्यरत राहणार आहेत. आज पोलीस अधीक्षक, ठाणे ग्रामीण येथे उभारण्यात आलेल्या सीसीटीव्ही नियंत्रण कक्षाचे कोकण परिक्षेत्र विशेष पोलीस महानिरीक्षक संजय दराडे यांच्या हस्ते उद्घाटन झाले. यावेळी पोलीस अधीक्षक डॉ. डी. एस. स्वामी व अपर पोलीस अधीक्षक भारत तांगडे उपस्थित होते.
सीसीटीव्ही नियंत्रण कक्षात १० सीसीटीव्ही स्क्रिन उभारण्यात आल्या आहेत. या स्क्रिनच्या मदतीने पोलीस हायवे, ज्वेलर्स, दुकाने, हॉटेल्स, पेट्रोल पंप, घराबाहेरील कॅमेरे, शाळा-कॉलेज, मंदिर, एसटी स्टॅण्ड अशा विविध ठिकाणी करडी नजर ठेवणार आहेत. तीन शिफ्टमध्ये गरजेनुसार प्रत्येक ठिकाणी ही नजर ठेवली जाणार आहे. भविष्यात या स्क्रिनची आणि कॅमेऱ्यांची संख्या वाढवण्यात येणार असल्याची माहिती विशेष पोलीस महानिरीक्षक संजय दराडे यांनी दिली.
Comment List