राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्या पत्नी प्रतिभा पवार आणि त्यांची नात खासदार सुप्रिया सुळे यांची कन्या रेवती सुळे यांना बारामती टेक्सटाईल पार्कच्या गेटवर रोखण्यात आले. तब्बल अर्धा तास त्यांना गेटवर थांबवण्यात आलं होतं. अर्ध्या तासानंतर त्यांना आतमध्ये सोडण्यात आलं आहे.
खासदार सुप्रिया सुळे यांच्या कार्यालयाकडून या संदर्भातील हा व्हिडीओ प्रसिद्ध करण्यात आला. दरम्यान, गेटवर अडवल्यानंतर प्रतिभा पवार चांगल्याच संतापल्या. त्यांनी गेटवरील सुरक्षारक्षकाला विचारणा केली. प्रतिभा पवार म्हणाल्या, तुम्ही गेट का बंद केलं? आम्हाला पाहून गेट बंद केलं का? तुम्हाला कुठून फोन आला? कोणाचा फोन आला? आतमध्ये सगळं सुरू आहे की बंद आहे? आतमध्ये सगळं सुरू आहे तर मग अडवत का आहात? आम्ही चोरी करायला थोडीच आलो आहोत. आम्हाला इथे खरेदी करायची आहे. ज्यांनी बंद करायला सांगितले आहे, त्यांना सांगा आम्हाला खरेदी करायची आहे. गेटवरील सुरक्षारक्षक साहेबांनी सांगितल्यामुळे मी गेट बंद केले आहे. माझी तेवढीच ड्युटी आहे, असे व्हिडीओमध्ये सांगत असल्याचे दिसत आहे.
आईला अडवल्यानंतर सुप्रिया सुळेही संतापल्या
सुप्रिया सुळे म्हणाल्या, माझी आई प्रतिभा पवार, माझी मुलगी रेवती सुळे. या दोघी बारामतीतल्या टेक्सटाईल पार्कमध्ये गेल्या होत्या. त्या ठिकाणी त्यांना अर्धा तास थांबून ठेवण्यात आल्याची मला माहिती कळाली आहे. ज्या शरद पवारांनी बारामतीत हा पार्क उभा केला, त्या शरद पवारांच्या पत्नीला अर्धा तास त्या ठिकाणी थांबवलं जातं. आता सत्ता आहे म्हणून हे ठीक आहे, ते लोकांना कसेही वागवू शकतात. दरम्यान, अर्धा तास वाट पाहिल्यानंतर प्रतिभा पवार यांना बारामती टेक्सटाईल पार्कच्या गेटमधून आत सोडण्यात आले.
Comment List