भाजपच्या निष्क्रिय आमदारांमुळे पेण विधानसभा मतदारसंघाचा विकास थांबला आहे. त्यामुळे यावेळी मतदारांनीच परिवर्तन करण्याचा निर्धार केला असून कोणत्याही परिस्थितीत शिवसेनाच जिंकणार असल्याचा विश्वास शिवसेना (उद्धव बाळासाहेब ठाकरे) पक्षाचे नेते, माजी केंद्रीयमंत्री अनंत गीते यांनी व्यक्त केला. महाविकास आघाडीचे उमेदवार प्रसाद भोईर यांच्या प्रचारासाठी कोलाड नाक्यावर भव्य सभा झाली. यावेळी महाविकास आघाडीचे कार्यकर्ते मोठ्या संख्येने उपस्थित होते.
हजारोंच्या संख्येने उपस्थित जनसमुदायाला संबोधित करताना अनंत गीते यांनी सत्ताधारी महायुतीवर सडकून टीका केली. गद्दारी करून आलेले सरकार आता आपटल्याशिवाय राहणार नाही, असा विश्वास त्यांनी व्यक्त केला. पेण विधानसभा मतदारसंघात भाजपचे आमदार रवींद्र पाटील यांच्या निष्क्रिय कारभारामुळे प्रचंड नाराजी आहे. रस्ते, पाणी, आरोग्याच्या समस्याही सुटलेल्या नाहीत. त्यामुळे प्रसाद भोईर यांचा शंभर टक्के विजय होईल, असेही ते म्हणाले. व्यासपीठावर सहसंपर्कप्रमुख किशोर जैन, तालुकाप्रमुख समीर शेडगे, उल्का महाजन, उपजिल्हाप्रमुख नंदू शिर्के, सोपान सुतार, काँग्रेसच्या नंदा म्हात्रे, दर्शना जवके, चंद्रकांत लोखंडे, चेतना लोखंडे, महादेव जाधव, कुलदीप सुतार, विष्णू लोखंडे, संतोष खेरटकर, असिफ पठाण, सुनील महाडिक, गणेश शिंदे, ज्ञानेश्वर खामकर, संतोष पडवळ, संदीप माने, रवींद्र सानप, शैलेश सानप, वैभव जैतपाल, शहबाज हाफिज, आझम हाफिज, उत्तम दहिंबेकर, चंद्रकांत कापसे आदी उपस्थित होते.
विविध संघटनांचा पाठिंबा
शिवसेना (उद्धव बाळासाहेब ठाकरे) उमेदवार प्रसाद भोईर यांना सर्वहारा जनआंदोलन समिती आणि भारत जोडो अभियानने पाठिंबा दिला. या सभेत तालुकाप्रमुख समीर शेडगे, कुलदीप सुतार, उल्का महाजन, नंदा म्हात्रे यांचीही भाषणे झाली.
Comment List