उत्तर प्रदेशातील अमेठीमध्ये मंगळवारी अंगावर काटा आणणारी घटना समोर आली आहे. निहालगड स्थानकाजवळ एक डंपर थेट रेल्वेचे फाटक तोडून रेल्वे रुळावर गेला आणि अडकला. याचदरम्यान मालगाडी आली आणि डंपर धडक देत 100 मीटर फरफटत नेले. या अपघातामुळे मालगाडीचे इंजिन बिघडल्याने सहा तास मालगाडी ट्रॅकवर खोळंबली. सुदैवाने यात कोणतीही जीवितहानी झाली नाही. मात्र डंपरचा क्लीनर जखमी झाला आहे.
मिळालेल्या माहितीनुसार, निहालगड रेल्वे स्थानकावरून मालगाडी येणार असल्याचा सिग्नल मिळाल्यानंतर पूर शोहरत रेल्वे क्रॉसिंगचे गेटमन आनंद हर्षवर्धन गेट बंद करत होते. क्रॉसिंग बंद झाल्यानंतर रायबरेलीहून अयोध्येकडे जाणारा एक डंपर क्रॉसिंग बूम तोडत थेट रेल्वे ट्रॅकवर येऊन धडकला. गेटमनने ट्रॅकवर डंपर पाहताच क्रॉसिंग पूर्णपणे बंद केले.
क्रॉसिंग बंद झाल्यावर डंपर चालकाने डंपर डाउन रेल्वे लाईनच्या बाजूला उभा केला आणि गेटमनला क्रॉसिंग उघडण्यास सांगितले. मात्र गेटमनने त्याच्याकडे दुर्लक्ष करत तेथून पळ काढला. इतक्यात मालगाडी आली आणि डंपरला धडक देत 100 मीटर फरफटत घेऊन गेली.
या अपघातात डंपर आणि मालगाडीचे इंजिन तसेच ओची, इलेक्ट्रिक लाईन, पोल, बॅरिकेडिंग, वायर इत्यादी वस्तूंचे नुकसान झाले. अपघातामुळे रेल्वे वाहतूक विस्कळीत झाली. सुमारे सहा तासांनी दुसरे इंजिन जोडून मालगाडी रवाना करण्यात आली.
Comment List