मतदान कार्ड ‘आधार’शी लिंक करण्याचा मार्ग मोकळा झाला आहे. निवडणूक आयोगाची एक महत्त्वाची बैठक आज दिल्लीत पार पडली. या बैठकीत मतदान कार्ड ‘आधार’शी लिंक करण्याचा निर्णय घेण्यात आला. संविधानाच्या अनुच्छेद 326 आणि लोकप्रतिनिधी कायद्यातील तरतुदींच्या आधारावर हा निर्णय घेण्यात आला.
मुख्य निवडणूक आयुक्त ज्ञानेश कुमार, निवडणूक आयुक्त सुखबीर सिंग संधू आणि निवडणूक आयुक्त विवेक जोशी, केंद्रीय गृह सचिव गोविंद मोहन, विधिमंडळ विभागाचे सचिव राजीव मणी आणि यूआयडीएआयचे सीईओ भुवनेश कुमार यांच्यात दिल्लीत महत्त्वाची बैठक झाली. या बैठकीत मतदान कार्ड ‘आधार’शी लिंक करण्यास मंजुरी देण्यात आली.
केंद्रीय निवडणूक आयोगाने या संदर्भात एक निवेदन जारी केले आहे. संविधानाच्या अनुच्छेद 326 आणि 1950 च्या लोकप्रतिनिधी कायद्याच्या कलम 23(4), 23(5) आणि 23(6) नुसार EPIC आधारशी लिंक केले जाईल, असे निवेदनात म्हटले आहे. यापूर्वी सरकारने पॅन कार्ड आधारशी लिंक करण्याचा निर्णय घेतला होता. अनुच्छेद 326 नुसार फक्त हिंदुस्थानच्या नागरीकाला मतदानाचा अधिकार देण्यात आला आहे.
पुढील तीन महिन्यांत डुप्लिकेट क्रमांक असलेल्या मतदार ओळखपत्रांना नवीन EPIC क्रमांक जारी केले जातील. डुप्लिकेट क्रमांक असण्याचा अर्थ बनावट मतदार नाही, असे निवडणूक आयोगाने अलिकडेच म्हटले होते. EPIC शी आधार लिंक करण्यामागील मुख्य उद्देश मतदार यादीतील अनियमितता दूर करणे आणि ती पारदर्शक करणे हा आहे. या पावलामुळे बनावट मतदार ओळखण्यास मदत होईल, असा निवडणूक आयोगाला विश्वास आहे.
Comment List