मोहाली येथील देशाच्या विज्ञान शिक्षण आणि संशोधन संस्था (IISER) येथे काम करणाऱ्या 39 वर्षीय शास्त्रज्ञाचा सेक्टर 67 मधील त्यांच्या भाड्याच्या घराजवळ पार्किंगच्या वादातून झालेल्या मारहाणीत मृत्यू झाल्याची धक्कादायक घटना समोर आली आहे. डॉ. अभिषेक स्वर्णकर यांचा मंगळवारी रात्री शेजारी असलेल्या मोंटीशी वाद झाला आणि त्यानंतर मोंटीने त्यांना जमिनीवर आपटून मारहाण केली.
मूळचे झारखंडच्या धनबादचे असलेले डॉ. स्वर्णकर हे एक प्रतिष्ठित शास्त्रज्ञ होते ज्यांचे काम आंतरराष्ट्रीय जर्नल्समध्ये प्रसिद्ध झाले होते. ते स्वित्झर्लंडमध्ये काम करत होते आणि अलीकडेच हिंदुस्थानात परतले होते आणि प्रकल्प शास्त्रज्ञ म्हणून IISER मध्ये सहभागी झाले होते. या शास्त्रज्ञाचे नुकतेच मूत्रपिंड प्रत्यारोपण झाले होते आणि त्यांच्या बहिणीने त्यांना त्यांची एक मूत्रपिंड दान केली होती. ते डायलिसिसवर होते. हल्ल्यानंतर त्यांना तातडीने रुग्णालयात नेण्यात आले जिथे त्यांचा मृत्यू झाला.
डॉ. स्वर्णकर मोहालीतील सेक्टर 67 मध्ये त्यांच्या आईवडिलांसह राहत होते. सीसीटीव्ही कॅमेऱ्यात काही स्थानिक रहिवासी, ज्यामध्ये मोंटी देखील होते, त्यांच्या बाईकजवळ उभे असल्याचे दिसून आले आहे. त्यानंतर अभिषेक दुचाकीकडे चालत जातो आणि ती काढू लागतो. वाद सुरू होतो आणि मोंटी डॉ. स्वर्णकर यांना जमिनीवर ढकलतो आणि त्यांना मारायला सुरुवात करतो. त्यांच्या कुटुंबीयांनी हस्तक्षेप करून मोंटी यांना खेचून नेले. इतर शेजारी घराबाहेर पडण्यापूर्वी डॉ. स्वर्णकर जमिनीवर पडलेले दिसतात.
शास्त्रज्ञाच्या कुटुंबाने आरोपींवर कठोर कारवाईची मागणी केली आहे. पोलिसांनी सांगितले की त्यांनी खुनाचा गुन्हा दाखल केला आहे आणि पुढील कारवाईसाठी सीसीटीव्ही फुटेज स्कॅन करत आहेत. त्यांनी सांगितले की आरोपी मोंटी फरार आहे आणि त्याला अटक करण्यासाठी छापे टाकले जात आहेत. त्याचा शोध घेण्यासाठी पोलीस मोंटी याचा फोन देखील ट्रॅक करत आहेत.
Comment List