भोपाळमध्ये लोकायुक्त आणि आयकर विभागाने अवघी 7 वर्षांची नोकरी करून राजीनामा देणाऱया वाहतूक हवालदार सौरभ शर्माच्या घरात झाडाझडती घेतल्यानंतर कोटय़वधी रुपयांचे घबाड सापडले आहे. 3 कोटी रुपये रोख रक्कम, 2 कोटी रुपये किंमतीचे दोन क्विंटल चांदीचे दागिने, 10 किलो चांदीचे दागिने, 50 लाख रुपये किंमतीचे सोन्याचे दागिने, दोन आलिशान कार, नोटा मोजण्याच्या 7 मशीन याचा समावेश आहे. नोकरी मिळाल्यापासून राजीनामा देण्यापर्यंतच्या संपूर्ण कथेत सरकारची त्याच्यावर खूप मेहरबानी असल्याचे समोर आले. सात वर्षांच्या नोकरीत तो कोटय़धीश झाला होता. तो हवालदार असला तरी मंत्री आणि अधिकाऱयांचा तो सर्वात लाडका होता. यातून त्याने कोटय़वधी रुपयांची माया जमवली. सौरभ शर्माकडे मध्य प्रदेशच्या निम्म्या वाहतूक चेकपोस्टची जबाबदारी होती. या चेकपोस्टमध्ये येणाऱया सर्व रोख रकमेचा तो स्वतः व्यवहार करत असे. चेकपोस्टवर तैनात असलेल्या इन्स्पेक्टर आणि इतर अधिकाऱयांचा ‘हिस्सा’ तोच ठरवायचा. त्याच्या कामात कोणताही अधिकारी किंवा निरीक्षक ढवळाढवळ करत नव्हता इतकी त्याची पॉवर वाढली होती.
चेकपोस्टचे कंत्राट स्वतःकडे ठेवले
सौरभने सरकारी चेकपोस्टचे खासगीकरण केले. त्याने हे चेकपोस्ट कंत्राटावर दिले होते. प्रत्येक चेकपोस्टवरून प्रत्येक दिवसासाठी ठराविक रक्कम ठरवलेली होती. हे पैसे तो स्वतः चेकपोस्टवरून घेत असे. 1 जुलै 2024 पूर्वी, मध्य प्रदेशात एकूण 47 वाहतूक चेकपोस्ट होत्या, त्यापैकी सौरभ 23 हाताळत होता. चेकपोस्टवरून पैसे गोळा करून वाटप करायचा. ही रक्कम सौरभ स्वतः चेकपोस्टवरून ठरलेल्या ठिकाणी पोहोचवत असायचा.
दुबईला पळून जाण्यासाठी राजीनामा
आपण केलेल्या भ्रष्टाचारामुळे अटक होऊ शकते, याची कुणकुण सौरभला लागली होती. त्यामुळे त्याने तपास सुरू होताच आपल्या पदाचा राजीनामा दिला. एखाद्या व्यक्तीची चौकशी सुरू असल्यास त्याचा राजीनामा स्वीकारला जात नाही, असे असतानाही त्याचा राजीनामा स्वीकारण्यात आला. सौरभने राजीनामा दिल्यानंतर 3 महिन्यांचा नोटीस कालावधीसुद्धा पूर्ण केला नाही. सौरभ सध्या दुबईला पळून गेला आहे.
Comment List