मालवणच्या राजकोट किल्ल्यावरील छत्रपती शिवाजी महाराजांचा पुतळा उभारताना निष्काळजीपणा केल्याच्या आरोपावरून अटक केलेल्या शिल्पकार जयदीप आपटेने जामिनासाठी उच्च न्यायालयात धाव घेतली आहे. पुतळा कोसळून कोणत्याही व्यक्तीला शारीरिक दुखापत झालेली नाही. एफआयआरमध्ये तसा कुठे आरोप नाही. जोरदार वाऱयामुळेच पुतळा कोसळला, असा दावा आपटेने जामीन अर्जात केला आहे.
सध्या न्यायालयीन कोठडीत असलेल्या जयदीप आपटेने सिंधुदुर्ग जिल्हा व सत्र न्यायालयात जामीन अर्ज केला होता तो अर्ज फेटाळण्यात आल्यानंतर त्याने उच्च न्यायालयात दाद मागितली आहे. त्याच्यातर्फे अॅड. गणेश सोवनी यांनी अर्ज केला आहे. त्या अर्जावर सुनावणी करताना न्यायमूर्ती अनिल किलोर यांनी आपटेच्या वकिलांचा युक्तिवाद ऐकून घेतला आणि सरकारी पक्षाला नोटीस जारी करून 12 नोव्हेंबरला उत्तर सादर करण्याचे आदेश दिले. राजकोट किल्ला परिसरात उभारलेला शिवपुतळा अवघ्या आठ महिन्यांत कोसळला. या घटनेने पुतळा उभारणीचे निकृष्ट काम उघड झाल्यानंतर जयदीप आपटेला 4 सप्टेंबर रोजी कल्याणमधून अटक केली होती.
जामीन अर्जातील दावे
मालवणातील छत्रपती शिवाजी महाराजांचा पुतळा कोसळण्याची घटना सोसाटय़ाच्या वाऱयामुळेच घडली आहे. आपल्याला यात नाहक गोवले असून या घटनेला कोणतेही मानवी कृत्य जबाबदार धरले जाऊ शकत नाही.
पुतळा उभारणीचे काम दिलेल्या ‘नेव्हल डॉकयार्ड’ने इन्स्पेक्शन केल्यानंतर कामात त्रुटी असल्याची कुठलीही तक्रार केली नव्हती, मात्र दुर्घटना घडल्यानंतर तांत्रिक तज्ञ नसलेल्या पीडब्ल्यूडी इंजिनीअरने नऊ तासांत एफआयआर दाखल केला.
28 मे 2023 रोजी मध्य प्रदेशातील महाकाल उज्जैनमध्ये सोसाटय़ाचा वारा आणि मुसळधार पावसामुळे सातपैकी सहा पुतळे कोसळले होते. त्यावेळी तेथील सरकारने पुतळे कोसळण्याच्या घटनेमागील कारणांचा शोध घेण्यासाठी चौकशीचे आदेश दिले होते. तशाच प्रकारे मालवणातील घटनेप्रकरणी तज्ञांच्या समितीचा अहवाल मिळाल्यानंतरच गुन्हा दाखल केला पाहिजे होता.
Comment List