शिवसेनेने आज मिंधे गटाला जोरदार झटका दिला. माजी मंत्री बबनराव घोलप यांनी मिंध्यांना रामराम करत शिवसेनेत घरवापसी केली. मातोश्री निवासस्थानी शिवसेना पक्षप्रमुख उद्धव ठाकरे आणि शिवसेना नेते, युवासेनाप्रमुख आदित्य ठाकरे यांनी घोलप यांना शिवबंधन बांधून त्यांचे पक्षात स्वागत केले.
उद्धव ठाकरे यांनी यावेळी बबनराव घोलप आणि त्यांच्याबरोबर शिवसेनेत आलेल्या कार्यकर्त्यांना मार्गदर्शन केले. बबनराव घोलप यांनी आज शिवसेनेत घरवापसी केली. त्यांचे स्वागत आहे. आता त्यांनी शिवसेनेची मशाल घरोघरी पोहोचवावी, असे आवाहन यावेळी उद्धव ठाकरे यांनी केले. यावेळी शिवसेना नेते विनायक राऊत, उपनेते रवींद्र मिर्लेकर उपस्थित होते.
शिवसेनेने बबनराव घोलप यांचे पुत्र योगेश घोलप यांना देवळाली मतदारसंघातून उमेदवारी दिली आहे. शिवसैनिकांमध्ये प्रचंड उत्साह आहे. अशा वेळी बबनराव घोलप यांनीही मिंधे गटाचा राजीनामा देऊन आज शिवसेनेत जाहीर प्रवेश केला. समाजासाठी आणि मतदारसंघातील विकासकामांसंदर्भात आपण सरकारकडे मागणी केली होती. परंतु एकही मागणी पूर्ण झाली नाही, त्यामुळे समाज आपल्यावर नाराज झाला आहे, असे घोलप यांनी राजीनामापत्रात म्हटले आहे.
Comment List