तालुक्यातील आळसुंदे- वरकुटे शिवरस्त्यावरील अतिक्रमणांविरोधात सामाजिक कार्यकर्ते राणा वाघमारे यांच्या नेतृत्वाखाली आळसुंदे ग्रामस्थांकडून करमाळा-कुडुवाडी रस्त्यावर जेसीबीवर चढून ‘शोले स्टाईल’ रास्ता रोको आंदोलन करण्यात आले. शेतीसाठी पर्यायी रस्ता अथवा शिव रस्त्याविषयी आश्वासन दिल्याशिवाय रस्त्यावरून न उठण्याचा पवित्रा आंदोलकांनी घेतल्यामुळे शुक्रवारी सकाळी दहा वाजता सुरू झालेले आंदोलन दुपारपर्यंत चालू राहिल्यामुळे रस्त्याच्या दोन्ही बाजूला वाहनांच्या रांगा लागल्या होत्या.
आंदोलनकर्ते राणा वाघमारे हे जेसीबीवर चढून ‘शोले स्टाईल’ने आंदोलन करत असताना त्यांना खाली घेण्यासाठी अग्निशमन दलाची गाडी आंदोलनस्थळी बोलाविण्यात आली. त्याचवेळी आंदोलकांना पांगविण्यासाठी महिलांच्या अंगावर अग्निशमन गाडी घालण्याचा प्रयत्नही केला गेला. तसेच आंदोलनस्थळी पोलीस प्रशासनाच्या वतीने 60 ते 70 पोलीस कर्मचाऱ्यांचा फौजफाटा तैनात करण्यात आला होता.
आंदोलनकर्ते व आळसुंदे ग्रामस्थ ठोस आश्वासन मिळाल्याशिवाय रस्त्यावरून हटत नसल्याने दुपारी तहसीलदार शिल्पा ठोकडे यांनी आंदोलनस्थळी भेट देऊन मध्यस्थी केली व त्यानंतर ‘रास्ता रोको’ आंदोलन स्थगित करण्यात आले. या आंदोलनानंतर पुन्हा एकदा आळसुंदे ग्रामस्थांना आळसुंदे व वरकुटे गावाचे गाव नकाशासह शिवरस्त्याची हद्द व खुणा निश्चित करून शिवरस्ता खुला करून देण्याबाबतचे लेखी आश्वासन देण्यात आले.
या अगोदरही आळसुंदे-वरकुटे शिवरस्त्यासाठी आंदोलनकर्ते राणा वाघमारे यांच्यासह आळसुंदे ग्रामस्थ 24 फेब्रुवारी रोजी शिवरस्त्यावरच आमरण उपोषणासाठी बसले होते. त्यावेळी प्रशासनाच्या मध्यस्थीने 28 फेब्रुवारीला आळसुंदे-वरकुटे शिव रस्ता खुला करण्यात येईल, असे तहसीलदारांकडून लेखी आश्वासन घेतल्यानंतर आंदोलकांनी आंदोलन स्थगित केले होते. त्यानंतरही कोणतीही कारवाई न झाल्याने शुक्रवारी पुन्हा एकदा आळसुंदे ग्रामस्थांना ‘रास्ता रोको’ आंदोलन करावे लागले.
यावेळी ‘रास्ता रोको’ आंदोलनासाठी जोतिराम घाडगे, संजय धारेकर, शहाजी घाडगे, अभिमान घाडगे, श्रीकांत येवले, सचिन सरवदे, शहाजी देवकते, अशोक घाडगे, तात्या सरडे, आगतराव बेडकुते, गणेश टकले, किशोर शिंदे, रामराजे डोलारे, गणेश भांडवलकर, बालाजी घाडगे, रामभाऊ हांडे, गणेश देवकते, अतुल माने, नवनाथ सरवदे, गणेश माने, जयसिंग घाडगे, अक्षय घाडगे, परम मोरे, जयसिंग पाटील, नाना मोरे, अनिकेत घाडगे, राजू देवकते, आबा देवकते, महावीर घाडगे, श्रीराम पाडुळे, शुभम सपकाळ यांच्यासह महिला व आळसुंदे ग्रामस्थ मोठ्या संख्येने उपस्थित होते.
Comment List