अमेरिकेचे राष्ट्राध्यक्ष डोनाल्ड ट्रम्प यांनी तब्बल 60 देशांवर जशास तसे आयात शुल्क लागू केले. या आदेशानुसार हिंदुस्थानवर 26 टक्के आयात शुल्क लादण्यात आले. मात्र, या निर्णयामुळे अमेरिकेचीच जगभरात ‘कर’कचून नाकाबंदी सुरू झाल्याचे चित्र आहे. अतिरिक्त आयात शुल्कामुळे संतापलेल्या फ्रान्सने अमेरिकेतील गुंतवणूक थांबवली तर चीनने 34 टक्के आणि कॅनडाने 25 टक्के कर लादून अमेरिकेवर डोळे वटारले आहेत. त्यामुळे जगभरात सुरू असलेल्या व्यापार युद्धाचा आणखी भडका उडण्याची शक्यता आहे.
मोदींचे मौन, काँग्रेसची टीका
अमेरिकेने लादलेल्या करावर पंतप्रधान नरेंद्र मोदी यांनी मौन व्रत धारण केले आहे. अनेक देशांचे अमेरिकेशी चांगले संबंध आहेत. त्या देशांतील नेत्यांनीही अमेरिकेचा निर्णय चुकीचा असल्याचे आपल्या राष्ट्रहिताच्या दृष्टीने म्हटले आहे. परंतु, ट्रम्प यांचे मित्र म्हणवणारे मोदी अद्याप गप्पच आहेत, अशी तोफ काँग्रेस खासदार गौरव गोगोई यांनी डागली.
10 एप्रिलपासून अमेरिकेतून आयात केलेल्या सर्व वस्तूंवर 34 टक्के अतिरिक्त कर वसूल केला जाईल, असे चीनने स्पष्ट केले आहे. आम्ही स्वतःच्या अधिकारांचे आणि हिताचे रक्षण करण्यासाठी प्रत्युत्तरात्मक उपाय करत आहोत. दोन बड्या अर्थव्यवस्थांमधील तणावाचे व्यापार युद्धात रुपांतर होण्याची शक्यता आहे, असे चीनच्या वाणिज्य मंत्रालयाने म्हटले आहे.
अमेरिकन शेअर बाजारात प्रथमच कोलाहल
अमेरिकेच्या अतिरिक्त आयात शुल्काचा परिणाम अमेरिकन शेअर बाजारातही दिसला. पाच वर्षांत पहिल्यांदाच शेअर बाजारात कोलाहल माजले, अशी प्रतिक्रिया हार्वर्ड विद्यापीठातील प्राध्यापक म्हणून काम करणारे आणि अमेरिकेचे माजी राष्ट्राध्यक्ष बराक ओबामा आणि हीलरी क्लिंटन यांच्यासोबत काम केलेल्या लॉरेन्स समर्स यांनी दिली. अमेरिकन शेअर बाजारासाठी आजचा दिवस अत्यंत भयंकर होता, असे ते म्हणाले.
कच्च्या तेलाच्या किमती नीचांकी पातळीवर
कच्च्या तेलाच्या किमती चार वर्षांतील नीचांकी पातळीवर गेल्या आहेत. ब्रेंट फ्युचर्सचा दर शुक्रवारी 5.72 डॉलरने गडगडून 64.62 डॉलरवर आला. ही घसरण 8.2 टक्के आहे. तर यूएस वेस्ट टेक्सास इंटरमीडिएट क्रूड फ्युचर्सचा 5.90 डॉलरने घसरून 61.05 डॉलरवर स्थिरावला. ही घसरण 8.8 टक्के आहे.
चीन घाबरले, चुकीची खेळी केली – ट्रम्प
चीनने अमेरिकेतील उत्पादनांवर 34 टक्के अतिरिक्त आयात शुल्क लादण्याचा निर्णय घेतल्यानंतर अमेरिकेचे राष्ट्राध्यक्ष डोनाल्ड ट्रम्प यांनी चीन घाबरले असून त्यांनी चुकीची खेळी केल्याची प्रतिक्रिया टथ या सोशल मीडिया प्लॅटफॉर्मवरून दिली आहे. चीनला अशी जोखीम उचलणे परवडणारे नाही, असेही ट्रम्प यांनी म्हटले आहे.
शेअर बाजार कोसळले
मुंबई शेअर बाजाराचा निर्देशांक सेन्सेक्स 930 अंकांनी कोसळून 75,364 अंकांवर बंद झाला. तर राष्ट्रीय शेअर बाजाराचा निर्देशांक निफ्टी 340 अंकांनी घसरून 22,909 अंकांवर स्थिरावला. मोठ्या प्रमाणावर झालेल्या शेअर्सच्या विक्रीमुळे गुंतवणूकदारांचे 9.5 लाख कोटी रुपये बुडाले. जेएसडब्ल्यू, अदानी इंटरप्रायझेस, पीएसयू बँक, स्टेट बँक ऑफ इंडिया, सेंट्रल बँकेच्या शेअर्समध्ये घसरण झाली. दरम्यान, फार्मा सेक्टरमधील कंपन्यांचे शेअर्सही गडगडले. फार्मा इंडस्ट्रीजला एका वेगळ्या कॅटेगरीत पाहिले जात आहे. यासंबंधी लवकरच एक मोठी घोषणा केली जाण्याची शक्यता आहे.
Comment List