जवळपास दोन वर्षे एकमेकांना डेट केल्यानंतर अभिनेत्री तमन्ना भाटिया आणि अभिनेता विजय वर्मा यांनी ब्रेकअप केल्याचं समजतंय. ब्रेकअपनंतरही या दोघांनी त्यांच्यातील मैत्री कायम ठेवली आहे. आता नुकत्याच दिलेल्या एका मुलाखतीत नात्यातील आनंद या मुद्द्यावर आपलं मत मांडताना विजयने त्याची तुलना आईस्क्रीमशी केली आहे. आईस्क्रीममध्ये जे फ्लेवर्स (चव) येतील, त्याचा स्वीकार केला पाहिजे आणि परिस्थितीनुसार पुढे चाललं पाहिजे, असं तो म्हणाला.
‘आयएएनएस’ला दिलेल्या मुलाखतीत विजय म्हणाला, “तुम्ही रिलेशनशिप्सबद्दल बोलताय ना? माझ्या मते तुम्ही रिलेशिप्सचा आनंद आईस्क्रीम खाण्यासारखा घेतलात, तर तुम्ही खुश राहाल. म्हणजेच आईस्क्रीममधला जो फ्लेवर तुम्हाला मिळेल, तुम्ही त्याचा स्वीकार करून पुढे गेलं पाहिजे.” याआधी तमन्ना एका मुलाखतीत म्हटलं होतं, “मी माझ्या आयुष्यात जे काही निवडलंय, त्याने मी खुश आहे. मला नवीन लोकांना आवडतं आणि अनपेक्षित परिस्थितींचा माझ्यावर फारसा परिणाम होत नाही. मी ज्या गोष्टींशी कम्फर्टेबल असते, त्याच मी लोकांना सांगू शकते. यामुळे माझ्या वैयक्तिक आणि व्यावसायिक आयुष्यात समतोल राखण्यात मदत होते.”
तमन्ना आणि विजय यांची पहिली भेट 2022 मध्ये झाली होती. या दोघांनी ‘लस्ट स्टोरीज 2’मध्ये एकत्र काम केलं होतं. गोव्यातील नवीन वर्षाच्या पार्टीत तमन्ना आणि विजयला लिपलॉक करताना पाहिलं गेलं होतं. तेव्हापासून या दोघांच्या अफेअरच्या चर्चा सुरू झाल्या होत्या. त्यानंतर एका पुरस्कार सोहळ्यात विजय वर्मा आणि तमन्ना भाटियाला पुन्हा एकदा एकत्र पाहिलं गेलं होतं. सुरुवातीला या दोघांच्या रिलेशनशिपच्या फक्त चर्चा होत्या. नंतर जून 2023 मध्ये तिने विजय वर्माला डेट करत असल्याचं जाहीर केलं होतं. विजयला त्याच्या भावना लपवायला आवडत नाहीत म्हणून रिलेशनशिप जाहीर करण्याचा निर्णय घेतल्याचं तमन्नाने एका मुलाखतीत स्पष्ट केलं होतं.
33 वर्षीय तमन्नाने 2005 मध्ये ‘चांद सा रोशन चेहरा’ या चित्रपटातून करिअरची सुरुवात केली. तेलुगू आणि तमिळ चित्रपटसृष्टीतील ती यशस्वी आणि लोकप्रिय अभिनेत्री आहे. ‘बाहुबली’ या चित्रपटात तिने मुख्य भूमिका साकारली होती. तर 36 वर्षीय विजयने 2012 मध्ये ‘चटगांव’ या चित्रपटातून कारकिर्दीची सुरुवात केली. गली बॉय या चित्रपटातून त्याला लोकप्रियता मिळाली.
सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.
Comment List