सीबीएसई पॅटर्नवरून राष्ट्रवादी काँग्रेस शरदचंद्र पवार पक्षाच्या नेत्या खासदास सुप्रिया सुळे यांनी राज्य सरकारवर प्रश्नांची सरबत्ती केली आहे. एसएससी बोर्ड तुम्ही बंद करणार का? महाराष्ट्र सरकार काय निर्णय घेणार एसएससी बोर्डाचा? असे प्रश्न सुप्रिया सुळे यांनी उपस्थित केले आहेत. सुप्रिया सुळे यांनी पत्रकार परिषद घेतली. त्यावेळी त्या बोलत होत्या.
सीबीएसई बोर्डात कन्व्हर्जन होणार आहे, हे ऐकून धक्काच बसला. आणि ते पहिलीपासून टप्प्या-टप्प्याने करणार आहेत. देशात प्रत्येक राज्याचं स्वतःचं स्टेट बोर्ड आहे. सीबीएसई, आयसीएसई आहे आणि महाराष्ट्रात तर आता इंटरनॅशनल बॅक्लोरिएट आयबीच्या शाळा आहेत. तुम्हाला परदेशी आयबीच्या शाळा चालतात, मग एसएससीची शाळा तुम्हाला चालत नाही? सीबीएसईमध्ये किती टक्के मराठी असणार आहे? महाराष्ट्राचा इतिहास, महाराष्ट्राचं लिखाण, महाराष्ट्राच्या कविता हे सीबीएसई बोर्डाच्या अभ्यासक्रमात आहे का? मी स्वतः एसएससी बोर्डातून शिकले आहे. त्यामुळे पालकांना बोर्ड निवडण्याचं स्वातंत्र्य द्या. एसएससी बोर्डाच्या विरोधात हे का निर्णय घेताहेत? या प्रश्नाचं उत्तर सरकारने द्यावं, अशी मागणी सुप्रिया सुळे यांनी केली.
सीबीएसई बोर्ड करताना तुमची तयारी आहे का? राज्यात तेवढे शिक्षक आहेत का? प्रत्येक शाळेमध्ये शिक्षक आहेत का? महापालिका, नगरपालिका, नगरपरिषदेच्या शाळांमध्ये शिक्षकांच्या किती जागा रिक्त आहेत? तुम्ही एवढा मोठा बोर्डचं ट्रान्झिशन करताहेत, तुमची सीबीएसईची तयारी आहे का? हा खूप तांत्रिक आणि गंभीर मुद्दा आहे. इतक्या सहज त्यांनी वक्तव्य केलं की ते धक्कादायक होतं, असे सुप्रिया सुळे म्हणाल्या.
मराठी भाषेचं काय होणार? तामिळनाडूत जे आंदोलन करायला लागले ते आता खरं व्हायला लागलं आहे. कदाचित मराठीसाठी आपल्यालाही करावं लागेल. कारण एसएससी बोर्ड हे तुम्ही बंद करणार का मग? महाराष्ट्र सरकार काय निर्णय घेणार त्याचा? खूप गंभीर विषय आहे, हा हलक्यात घेता येणार नाही. आम्ही सरकारला असं करू देणार नाही, असा इशाराही सुप्रिया सुळे यांनी दिला.
Comment List