कोल्हापूर जिल्हा सत्र न्यायालयाने जामीन अर्ज फेटाळल्यानंतरही उच्च न्यायालयात धाव घेणारा नागपूरचा शिवशंभूद्रोही आणि मुख्यमंत्री तथा राज्याचे गृहमंत्री देवेंद्र फडणवीस यांच्यासाठी चिल्लर असलेला तथाकथित पत्रकार प्रशांत कोरटकर हा गेल्या बावीस दिवसांपासून फरार आहे. आतातर इंदूर,चंद्रपूर नंतर थेट कोलकता मार्गे कोरटकर दुबईला पळून गेल्याचे प्रसारमाध्यमांतून समोर आल्याने,गृहखात्याच्या तपासावर प्रश्नचिन्ह उपस्थित झाला आहे. या पार्श्वभूमीवर आरोपी प्रशांत कोरटकर याचा पासपोर्ट पोलीस स्टेशनला आणून दाखविणे आणि पासपोर्ट जमा करण्याबाबत त्यांच्या पत्नीलाउपस्थित राहण्याचे समन्स पाठविण्याची मागणी तक्रारदार इतिहास संशोधक इंद्रजित सावंत यांनी पत्राद्वारे जुना राजवाडा पोलिस ठाण्यातील तपास अधिकाऱ्यांना केले आहे.
या पत्रात इंद्रजित सावंत यांनी म्हटले आहे की, मला फोन करून छत्रपती शिवाजी महाराज आणि छत्रपती संभाजी महाराज यांच्याबद्दल अपमानकारक नीच वक्तव्य व जातीमध्ये द्वेष निर्माण करणारे संभाषण याबद्दल प्रशांत कोरटकर या तथाकथित पत्रकाराविरोधात गुन्हा जुना राजवाडा पोलीस स्टेशनला नोंद झालेला आहे. पण आरोपी प्रशांत कोरटकर अजूनही फरार आहे. आजपर्यंत प्रशांत कोरटकर हा इंदूर, चंद्रपूर, कोलकाता अशा ठिकाणी लपून बसल्याच्या बातम्या येत होत्या,पण आता तो थेट दुबईला पळून गेल्याचे समोर येत आहे. पोलिसांना फरार आरोपीची चौकशी करण्यासाठी सगळ्या कायदेशीर मार्गांचा वापर करण्याचा अधिकार आहे. माझी विनंती आहे कि, आरोपी प्रशांत कोरटकर याचा पासपोर्ट पोलीस स्टेशनला आणून दाखविणे आणि पासपोर्ट जमा करण्याबाबत त्याच्या पत्नीला उपस्थित राहण्याचे समन्स काढून पोलिसांनी त्यांची तपासात मदत घ्यावी. प्रशांत कोरटकरला लपण्यासाठी व नागपूरातून पळून जाण्यासाठी, दुबईला पलायन करण्यासाठी ज्यांनी मदत केली असेल तर त्यांची चौकशी करावी हे कायद्या च्या दृष्टीने आवश्यक असल्याचे या पत्रात म्हटले आहे.पत्रावर तक्रारकर्ता इंद्रजीत सावंत यांच्यासह त्यांचे वकिल ॲड. असीम सरोदे, ॲड. हेमा काटकर, ॲड. योगेश सावंत, ॲड. पल्लवी थोरात यांच्या सह्या आहेत.
Comment List