तेरी मेहरबानियां…  मालकाला वाचविण्यासाठी श्वानाची वाघासोबत झुंज

असं म्हणतात की, कुत्रा हा प्राणी सर्वात जास्त इमानदार असतो. कुत्रा आपल्या मालकावर जिवापाड प्रेम करतो, जिवावर उदार होऊन मालकाचे प्राण वाचवतो. अशीच एक घटना मध्य प्रदेशातील उमरिया जिह्यात घडलीय. बांधवगड व्याघ्र प्रकल्पाशेजारील भरहुत गावातील जर्मन शेफर्ड जातीच्या श्वानाने आपल्या मालकाला वाचविण्यासाठी वाघाशी लढा दिला. जवळपास दोन तास दोघांमध्ये झुंज झाली. श्वानाचा आक्रमकपणा बघून अखेर वाघाला तेथून पळ काढावा लागला.

मात्र या लढाईत गंभीर जखमी झालेल्या श्वानाला आपला जीव गमवावा लागला. या घटनेमुळे हळहळ व्यक्त होत आहे. उर्वरित आयुष्य म्हणजे लाडक्या श्वानाचं देणं असल्याची भावना त्याच्या मालकाने व्यक्त केली.  जर्मन शेफर्डचे मालक शिवम बडगैया म्हणाले की, ‘‘शेतात असताना अचानक माझ्यासमोर वाघ आला. वाघ माझ्यावर हल्ला करणारच होता. तितक्यात माझ्या बँथोने (श्वानाचं नाव) वाघाची हालचाल पाहिली. स्वतःच्या जिवाची पर्वा न करता वाघावर हल्ला केला. वाघ आणि श्वानामध्ये दोन तास झुंज सुरु होती. त्याचं धाडस पाहून वाघानं हार मानली. वाघ श्वानाला सोडून पळून गेला. तोपर्यंत गावात वाघ शिरल्याची बातमी गावभर पसरली होती. गावकरी जमा झाले. गावकऱ्यांसह आम्ही जखमी श्वानापर्यंत पोहोचलो. त्याला ताबडतोब डॉक्टरांकडे नेले. डॉक्टरांनी त्याला वाचवण्याचा आटोकाट प्रयत्न केला, पण तो वाचू शकला नाही.’’