आयटी इंजिनीअर तरुणीवर सामूहिक अत्याचार, शीतपेयातून गुंगीच्या गोळ्या दिल्या; मित्रासह 4 नराधमांवर गुन्हा

राज्यात महिला अत्याचाराच्या घटना दिवसेंदिवस वाढत असून, पुण्यात आयटी क्षेत्रात नोकरी करणाऱ्या इंजिनीअर तरुणीला शीतपेयातून गुंगीच्या गोळ्या देऊन चौघा नराधमांनी मुंबईत कांदिवली येथे सामूहिक अनैसर्गिक अत्याचार केल्याची धक्कादायक घटना उघडकीस आली आहे. सोशल मीडियावर फोटो व्हायरल करण्याची धमकी देत नराधम आरोपींनी पीडित तरुणीकडून दहा लाख रुपये आणि दोन आयफोन उकळले. याप्रकरणी पीडितेच्या मित्रासह चौघाजणांवर गुन्हा दाखल करण्यात आला आहे.

ही घटना कांदिवली मुंबईतील फॅब हॉटेल स्प्रिंगईन जवळ मोटारीत घडली आहे. 33 वर्षीय तरुणीने काळेपडळ पोलीस ठाण्यात फिर्याद दिली आहे. तमीम हरसल्ला खान (रा. कांदिवली) आणि त्याचे इतर तीन मित्र अशा चौघांविरुद्ध भादंवि कलम बलात्कार, अनैसर्गिक कृत्य, फसवणूक, अपहार, धमकावून मारहाण अशा कलमान्वये गुन्हा दाखल केला आहे. दरम्यान, हा प्रकार कांदिवली येथे घडल्यामुळे गुन्हा पुढील तपासासाठी कांदिवली पोलीस ठाण्याकडे वर्ग केला आहे.

फेसबुकवर झाली ओळख

फिर्यादी तरुणी कर्नाटकातील असून, पुण्यात आयटी क्षेत्रात नोकरीला आहे. फेसबुकच्या माध्यमातून 2021 मध्ये आरोपी खान याच्यासोबत तिची ओळख झाली होती. खानने त्याच्या वडिलांचा मोठा बांधकाम व्यवसाय असून, तो पाहत असल्याची बतावणी केली. लग्नाच्या आमिषाने खानने तरुणीला जाळ्यात ओढल्याने ती भेटण्यासाठी कांदिवलीत गेली होती. फॅब हॉटेलमध्ये दोघे भेटले असता, खानने शीतपेयात गुंगीच्या गोळ्या टाकून तरुणीला द्रव्य पाजले. तिच्यावर बलात्कार केल्यानंतर कारमध्ये नेऊन मुंबईसह पुण्यातही अत्याचार केला.

तरुणीवर कारमध्ये अत्याचार करत असताना, त्याने तिघा मित्रांना बोलावून घेतले. तिघांनी तरुणीवर आळीपाळीने अनैसर्गिक अत्याचार केला. तरुणीचे फोटो सोशल मीडियावर व्हायरल करण्याची धमकी देत 10 लाख रुपये उकळले. विविध बँकांकडून कर्ज काढून 18 लाख रुपये घेतले. तसेच तिच्या क्रेडिट कार्डवरून दोन आयफोन खरेदी केल्याचे फिर्यादीत म्हटले आहे.