होळीच्या पूजेसाठी दादर फुजबाजारात फुले आणण्यासाठी निघालेल्या एका तरुणावर काळाने घाला घातल्याचे तर अन्य दोघे तरुण गंभीर जखमी झाल्याची दुर्घटना एल्फिन्स्टन उड्डाणपुलाजवळ घडली. पूल चढण्याआधी समोरून भरधाव आलेल्या एसटी महामंडळाच्या इलेक्ट्रिक बसने त्या तरुणांच्या दुचाकीला समोरून जोरदार धडक दिली. यात प्रणय बोडके या तरुणाचा जागीच मृत्यू झाला तर अन्य दोघे गंभीर जखमी झाले. या घटनेमुळे ते तरुण राहत असलेल्या काळाचौकी परिसरात शोककळा पसरली आहे.
काळाचौकीच्या काळेवाडी येथे राहणारे जयेश मयेकर (26) तसेच सोसायटीच्या मंडळातील अशोक रावनक (44), सिद्धेश गोपाळ (38), दुर्वेश गोरडे (25), करण कुमार शिंदे (29) आणि प्रणय बोडके (29) असे सर्वजण बुधवारी रात्री दोन वाजण्याच्या सुमारास दुचाकीवरून दादर पश्चिमेकडील फुल बाजारात फुले आणण्यासाठी निघाले होते.
जयेश आणि सिद्धेश हे एका दुचाकीवर तर दुर्वेश, करण आणि प्रणय हे तिघे दुसऱया दुचाकीवरून जात होते. एल्फिन्स्टन उड्डाणपुलाजवळ ते आले असता समोरून वेगात आलेल्या एसटी महामंडळाच्या इलेक्ट्रिक बसने आधी सिद्धेश चालवत असलेल्या दुचाकीला कट मारली. त्यानंतर पुढे जाऊन तिघे असलेल्या दुचाकीला समोरून जोरदार धडक दिली. या अपघातामुळे तिघेही रस्त्यावरच रक्ताच्या थारोळ्यात पडले. तसेच दुचाकीचे मोठे नुकसान झाले.
घटनेची माहिती मिळताच भोईवाडा पोलिसांनी लगेच घटनास्थळी जाऊन तिन्ही जखमी तरुणांना केईएम इस्पितळात नेले. मात्र डॉक्टरांनी तपासून प्रणय बोडके याला मृत घोषित केले. तर करण आणि दुर्वेश यांच्या डोक्याला गंभीर दुखापत झाल्याने त्यांना अतिदक्षता विभागात दाखल करण्यात आले.
दरम्यान, बेदकारपणे बस चालवून अपघाताला जबाबदार असलेला बसचालक मतिन शेख (29) याला पोलिसांनी पकडले. मतिन विरोधात गुन्हा दाखल करण्यात आला. मात्र या दुर्घटनेमुळे काळेवाडी येथील नागरिकांमध्ये शोककळा पसरली आहे. होळीच्या दिवशीच प्रणय, दुर्वेश आणि करण यांच्यासोबत दुर्घटना घडल्याने नागरिकांमधून हळहळ व्यक्त होत आहे.
Comment List