बीड जिल्हय़ात सत्ता, पैसा आणि गुंडगिरीच्या जोरावर सुरू असलेली मस्ती उतरलीच पाहिजे. संतोष देशमुख यांना न्याय मिळेपर्यंत हा लढा सुरूच राहणार असून आम्ही देशमुख कुटुंबाबरोबर आहोत, असे राष्ट्रवादी काँग्रेस शरद पवार गटाच्या खासदार सुप्रिया सुळे यांनी सांगितले.
खासदार सुप्रिया सुळे यांनी आज मस्साजोग येथे संतोष देशमुख यांच्या कुटुंबाची भेट घेतली. या वेळी त्यांच्यासमवेत खासदार बजरंग सोनवणे, आमदार जितेंद्र आव्हाड, आमदार संदीप क्षीरसागर होते. सुप्रिया सुळे यांना पाहताच देशमुख कुटुंबाचा बांध फुटला. माझा मुलगा गावाच्या भल्यासाठी झटत होता. म्हणूनच आज गाव आमच्या पाठीशी उभे आहे, हे सांगताना संतोष देशमुख यांच्या आईला अश्रू अनावर झाले.
मी तुमच्यासाठी लढत राहीनः सुप्रिया सुळे
देशमुख कुटुंबाचे सांत्वन करताना खासदार सुप्रिया सुळे यांनी मुख्यमंत्री देवेंद्र फडणवीस यांच्याकडे आपण न्यायासाठी पदर पसरणार असल्याचे सांगितले. संतोष देशमुख यांना तर मी परत आणू शकत नाही, पण तुमच्या नातवांसाठी मी न्याय मिळेपर्यंत लढत राहीन, अशी ग्वाही त्यांनी दिली.
संतोष देशमुखांची हत्या अनैतिक संबंधातून झाल्याचे दाखवण्याचा कट होता!
मस्साजोगचे सरपंच संतोष देशमुख यांची हत्या अनैतिक संबंधातून झाल्याचे दाखवण्याचा कट पोलिसांनी रचला होता, असा खळबळजनक आरोप गावकऱ्यांनी खासदार सुप्रिया सुळे यांच्यासमोर केला. संतोष देशमुख यांना घेऊन निघालेली रुग्णवाहिका कळंबकडे वळवण्यात आली होती. तेथे एका महिलाही तयार ठेवण्यात आली होती. तिच्या घरी मृतदेह टाकून ही हत्या अनैतिक संबंधातून झाल्याचे पोलिसांना दाखवायचे होते. परंतु मस्साजोगच्या तरुणांनी रुग्णवाहिकेचा पाठलाग केला आणि हा सर्व कट उधळला गेला, असे गावकऱ्यांनी सांगितले.
नैतिक जबाबदारी स्वीकारून धनंजय मुंडे यांनी राजीनामा दिला पाहिजे. मारेकऱ्यांना फाशी झाली पाहिजे. जलदगती न्यायालयात खटला चालवावा. सर्व आरोपींची ईडी तसेच सीबीआय चौकशी झाली पाहिजे. फरार आरोपी कृष्णा आंधळे याला तातडीने अटक झाली पाहिजे. देशमुख आणि मुंडे कुटुंबाला न्याय मिळाला पाहिजे. संपूर्ण आरोपींचे सीडीआर तपासले पाहिजे अशा मागण्या सुळे यांनी केल्या.
ज्ञानेश्वरी मुंडेंना अश्रू अनावर
परळी येथील महादेव मुंडे यांचा पंधरा महिन्यांपूर्वी निर्घृण पद्धतीने खून करण्यात आला होता. आज मुंडे कुटुंबीयांच्या भेटीला खासदार सुप्रिया सुळे परळीत पोहचल्या. सुप्रिया सुळेंना पाहताच महादेव मुंडे यांच्या पत्नी ज्ञानेश्वरी मुंडेंना अश्रू अनावर झाले. ‘माझ्या नवऱ्याचा काय दोष होता?’ असा सवाल करत त्यांनी टाहो फोडला. पंधरा महिने होऊन गेले. ना तपास, ना आरोपीला अटक. पोलीस काही माहिती देत नाहीत. जो अधिकारी आरोपींच्या दारात पोहचला होता त्याला अज्ञात इसमाचा फोन आला आणि तो अधिकारी माघारी फिरला. त्यानंतर त्याचे प्रमोशन करण्यात आले, असा गौप्यस्फोट ज्ञानेश्वरी मुंडे यांनी केला.
Comment List