BMC निवडणुकीआधी मुंबईत ठाकरे गटासाठी एक चिंता वाढवणारी बातमी

महाराष्ट्र विधानसभा निवडणूक निकालानंतर उद्धव ठाकरे गटाला गळती लागली आहे. ही गळती कशी थांबवायची? बाहेर पडणाऱ्या लोकांना कसं रोखायचं? हेच उद्धव ठाकरे यांच्या नेतृत्वासमोरील मुख्य आव्हान आहे. सध्या उद्धव ठाकरे गटातून पदाधिकारी, कार्यकर्ते, माजी नगरसेवक बाहेर पडल्याच्या दररोज बातम्या येत आहेत. उद्धव ठाकरे यांच्या गटातून बाहेर पडणारे बहुतेक जण एकनाथ शिंदे यांच्या शिवसेनेत प्रवेश करत आहेत. आता मुंबईतील माजी नगरसेवक नाराज असल्याची बातमी आली आहे. विधानसभा निवडणूक निकालानंतर ठाकरे गटाचं मातोश्रीवर आढावा बैठकांच सत्र सुरु आहे. त्यात विधानसभा निवडणुकीत काय चुकलं? महापालिकेला काय खबरदारी घेतली पाहिजे? यावर मंथन सुरु आहे.

आगामी मुंबई महापालिकेची निवडणूक उद्धव ठाकरे गटासाठी खूप महत्त्वाची आहे. कारण मुंबई महापालिकेवर गेली अनेक वर्ष शिवसेनेची एकहाती सत्ता आहे. पण आता शिवसेना फुटली आहे. एकनाथ शिंदे यांच्याकडे अधिकृत शिवसेना पक्ष आणि धनुष्यबाण हे निवडणूक चिन्ह आहे. त्याचवेळी उद्धव ठाकरे यांना नवीन मशाल चिन्ह घ्यावं लागलं आहे. विधानसभा निवडणुकीत एकनाथ शिंदे यांच्या नेतृत्वाखाली शिवसेनेला घवघवीत यश मिळालं. त्यांच्या नेतृत्वाखाली शिवसेनेचे 57 आमदार निवडून आले. त्याचवेळी उद्धव ठाकरे गटाला फक्त 20 जागा मिळाल्या. एकप्रकारे खरी शिवसेना कोणाची? या प्रश्नाच उत्तर मिळालं. त्यामुळे एकनाथ शिंदे यांच्या शिवसेनेकडे जाणाऱ्याचा ओघ वाढला.

BMC निवडणुकीत काय होणार?

आता ठाकरे गटाच्या मातोश्रीवर बैठका पार पडत आहे. पण त्यामध्ये डावलल जात असल्याच माजी नगरसेवकांच म्हणणं आहे. त्यामुळे या माजी नगरसेवकांमध्ये नाराजीची भावना आहे. लोकसभा आणि विधानसभा निवडणुकीत विश्वासात घेतलं नाही, असं या नगरसेवकांच म्हणणं आहे. मुंबईत ठाकरे गटाचे एकूण 99 माजी नगरसेवक आहेत. त्यातील जवळपास 36 माजी नगरसेवकांनी शिवसेना शिंदे गटात प्रवेश केला आहे. आता उर्वरित नगरसेवक नाराज असल्याची चर्चा आहे. म्हणजे महापालिका निवडणुका जाहीर झाल्यानंतर आणखी मोठ्या प्रमाणात माजी नगरसेवक शिवसेना शिंदे गटात प्रवेश करु शकतात.