महायुतीचे सरकार स्थापन झाल्यावर खातेवाटपावर तीनही पक्षाच्या नेत्यांत काथ्याकूट सुरू आहे. शिंदे गटाचे नेते एकनाथ शिंदे गृह, महसूल, नगरविकास यासारख्या मलईदार खात्यांसाठी अडून बसले आहेत. त्यातच मुख्यमंत्री देवेंद्र फडणवीस यांनी शिंदे गटाला गृहमंत्री पद देणार नसल्याचे स्पष्ट केले आहे.
एकनाथ शिंदे उपमुख्यमंत्री पद स्वीकारत सरकारमध्ये सहभागी झाले असले तरी महायुतीत गृहमंत्री पदाचा तिढा अद्याप कायम आहे. फडणवीस यांनी यासंदर्भात अद्याप जाहीरपणे भाष्य केलेले नव्हते, मात्र एका वृत्तवाहिनीला दिलेल्या मुलाखतीत फडणवीस यानी गृहमंत्री पदाबाबतची भूमिका स्पष्ट केली. गृहमंत्री पद सांभाळत असताना केंद्र सरकारशी, केंद्रीय गृह मंत्रालयाशी समन्वय ठेवावा लागतो. माझा केंद्रीय नेतृत्वाशी जास्तीत जास्त संबंध येतो. त्यामुळे गृह मंत्रालय भाजपकडेच असायला हवे, अशी भूमिका फडणवीस यांनी मांडली.
या राज्यात नक्षलवादाची समस्या आहे, मुंबईसारखे मोठे शहर सांभाळायचे आहे. या शहराची परिस्थिती खूप नाजूकपणे हाताळावी लागते. ही एक प्रकारे देशाची राजधानी आहे. माझा भाजपच्या पेंद्रीय नेतृत्वाशी नेहमी संपर्क असतो. आम्ही चांगल्या प्रकारे समन्वय राखतो. मी केंद्रीय गृह मंत्रालयाशी चांगल्या प्रकारे समन्वय साधू शकतो, असे सांगत फडणवीस यांनी गृह खात्याचा कारभार एकनाथ शिंदेंकडे देण्यास नकार दिला.
Comment List