पहलगाम हल्ल्यानंतर केंद्र सरकार कठोर पावले उचलत असून देशावर आलेल्या या संकटाच्या काळात आम्ही भक्कमपणे सरकारसोबत आहोत, अशी भूमिका सर्वच विरोधी पक्षांनी आज सर्वपक्षीय बैठकीत घेतली. अ‍ॅक्शन घ्या, दहशतवादी तळ उद्ध्वस्त करा, आमचा पाठिंबा आहे, असे विरोधी पक्षांनी सरकारला सांगितले. दरम्यान, दहशतवाद्यांना कल्पनेपेक्षाही मोठी शिक्षा मिळेल, असा इशारा पंतप्रधान नरेंद्र मोदी यांनी बिहारच्या मधुबनी येथे बोलताना दिला.
बैठकीच्या सुरुवातीला दोन मिनिटे मौन बाळगून पहलगाम हल्ल्यातील मृतांना श्रद्धांजली वाहण्यात आली. गृहमंत्री अमित शहा, संरक्षण मंत्री राजनाथ सिंह, संसदीय कार्यमंत्री किरेन रिजिजू, लोकसभेतील विरोधी पक्षनेते राहुल गांधी, राज्यसभेतील काँग्रेसचे गटनेते मल्लिकार्जुन खरगे यांच्यासह विरोधी पक्षांचे नेते बैठकीला उपस्थित होते.
सुरक्षेत चूक झाली, केंद्राने केले मान्य
पहलगाममध्ये सुरक्षेत चूक झाल्याचे सर्वपक्षीय बैठकीत केंद्र सरकारने मान्य केले. गुप्तचर यंत्रणा काय करत होती, तिथे सुरक्षा व्यवस्था का नव्हती, असा प्रश्न विरोधी पक्षांनी विचारला. त्यावर ’दरवर्षी अमरनाथ यात्रेवेळी जूनमध्ये पहलगामचा हा भाग खुला केला जातो. येथे यात्रेकरू विश्रांती घेतात. मात्र स्थानिक टूर ऑपरेटर्सनी सरकारला कल्पना न देता 20 एप्रिलपासूनच पर्यटकांसाठी हा भाग खुला केला. बुकिंग घेतली. स्थानिक प्रशासनालाही याची कल्पना नव्हती. त्यामुळे या भागात सुरक्षा व्यवस्था नव्हती, असे आयबी व गृह विभागाच्या अधिकाऱ्यांनी बैठकीत सांगितल्याची माहिती संसदीय कार्यमंत्री किरेन रिजिजू यांनी बैठकीनंतर दिली.
पंतप्रधान मोदींच्या अनुपस्थितीचा मुद्दा
या महत्त्वपूर्ण सर्वपक्षीय बैठकीत पंतप्रधान नरेंद्र मोदी उपस्थित नव्हते. हा मुद्दा चर्चेला आल्याची माहिती खरगेंनी दिली. त्यावर पंतप्रधानांना याबाबत ब्रिफिंग दिले जाईल, असे सरकारच्यावतीने सांगण्यात आले. मात्र यावर खरगे म्हणाले, अंतिम निर्णय घेण्याचा अधिकार पंतप्रधानांना असतात. त्यामुळे बैठकीला उपस्थित राहून त्यांनी प्रत्यक्ष ऐकणे महत्त्वाचे ठरते.
सरकारच्या कारवाईला पूर्ण समर्थन- राहुल गांधी
पहलगाम दहशतवादी हल्ल्याचा सर्वांनी निषेध केला. पीडितांना न्याय मिळाला पाहिजे, सरकारला कोणतीही कारवाई करण्यासाठी विरोधी पक्षांनी पूर्ण पाठिंबा दिल्याचे राहुल गांधी यांनी बैठकीनंतर प्रसारमाध्यमांना सांगितले. दरम्यान, लोकसभेतील विरोधी पक्षनेते राहुल गांधी शुक्रवारी कश्मीरला भेट देणार आहेत. पहलगाम दहशतवादी हल्ल्याच्या पार्श्वभूमीवर ते तेथील लोकांशी संवाद साधणार आहेत.
‘पहलगाम’नंतर…
- अमित शहा आणि जयशंकर यांनी घेतली राष्ट्रपती मुर्मू यांची भेट
- अमित शहांची असदुद्दीन ओवेसींशी फोनवर चर्चा
- घराबाहेर पडू नका; कश्मिरी विद्यार्थ्यांसाठी मार्गदर्शक सूचना
- हिंदुस्थानातून माघारी जाण्यासाठी अटारी चेक पोस्टवर पाकिस्तानी नागरिकांच्या रांगा
- पाकिस्तान सरकारच्या ‘एक्स’ हॅण्डलवर बंदी
- परराष्ट्र मंत्रालयात बैठक; अनेक देशांचे राजदूत सहभागी
- जम्मू–कश्मीरमध्ये न जाण्याची अमेरिकेची नागरिकांना सूचना
- हिंदुस्थान मोठे पाऊल उचलू शकते, ‘रशिया टुडे’ने दिले वृत्त
पाकिस्तानची दर्पोक्ती
- हिंदुस्थानला जलयुद्धाचे परिणाम भोगावे लागतील
- 1 मेपर्यंत हिंदुस्थानी नागरिकांना पाकिस्तान सोडण्याचे आदेश
- सिमला करारासह सर्व द्विपक्षीय करार रद्द
हिंदुस्थानशी सर्व व्यापार थांबवले
- अटारी–वाघा सीमा बंद
- हवाई क्षेत्रात बंदी
Comment List