पहिली पत्नी जिवंत असताना दुसरा विवाह करणे कायद्याला मान्य नाही. हा दुसरा विवाह कायदेशीर मानला जात नाही. असे असले तरी दुसऱ्या अवैध विवाहातून जन्मलेल्या मुलांनाही वडिलोपार्जित मालमत्तेमध्ये हक्क आहे, असा निर्वाळा ओडिशा उच्च न्यायालयाने दिला आहे. मालमत्ता हक्कावरून कौटुंबिक वादाचे प्रमाण वाढले आहे. त्या पार्श्वभूमीवर हा निर्णय महत्त्वपूर्ण मानला जात आहे.
हिंदू विवाह कायदा आणि हिंदू उत्तराधिकारी कायद्यातील तरतुदींच्या अनुषंगाने न्यायमूर्ती बी. पी. राउतराय आणि न्यायमूर्ती चित्तरंजन दास यांच्या खंडपीठाने हा निर्णय दिला आहे. दुसरा विवाह अवैध घोषित केला असला तरी त्या अवैध विवाहातून जन्मलेल्या मुलांना पित्याच्या मालमत्तेत संपूर्ण हक्क असेल. केवळ पित्याने स्वतः कमावलेल्या मालमत्तेत नव्हे, तर वडिलोपार्जित मालमत्तेतही हक्क असेल, असे खंडपीठाने म्हटले आहे. 80 वर्षीय वृद्ध महिलेने दिवंगत पतीच्या दुसऱ्या पत्नीच्या मुलांना वडिलोपार्जित मालमत्तेपासून दूर ठेवण्यासाठी न्यायालयाचे दार ठोठावले होते. न्यायालयाने अवैध विवाहातून जन्मलेल्या मुलांचाही पित्याच्या मालमत्तेत हक्क असल्याचे स्पष्ट करीत वृद्धेची याचिका फेटाळून लावली.
1956 च्या हिंदू विवाह कायद्याच्या कलम 16 मधील तरतुदीनुसार अवैध विवाहांतून जन्मलेल्या मुलांनाही कायदेशीर वैधता देण्यात आली आहे. ही मुलेदेखील हिंदू वारसाहक्क कायद्यांतर्गत वारसांच्या प्रथम श्रेणीत मोडतात.
Comment List