लातूर महानगरपालिकेचे आयुक्त बाबासाहेब मनोहरे यांनी डोक्यात गोळी झाडून आत्महत्येचा प्रयत्न केला. शनिवारी मध्यरात्री घडलेल्या या थराराने लातूर शहर हादरून गेले. गंभीर अवस्थेत मनोहरे यांना खासगी रुग्णालयात दाखल करण्यात आले. पहाटे त्यांच्यावर गुंतागुंतीची शस्त्रक्रिया करण्यात आली. मनोहरे यांची प्रकृती स्थिर असल्याचे उपचार करणाऱ्या डॉक्टरांनी सांगितले. मनोहरे यांनी गोळी झाडून घेण्याचे कारण अद्याप गुलदस्त्यातच आहे.
लातूर मनपाचे आयुक्त बाबासाहेब मनोहरे शनिवारी रात्री जेवण करून साडेअकराच्या सुमारास शासकीय बंगल्यातील आपल्या खोलीत गेले. खोलीत जाताच त्यांनी पिस्तुलातून डोक्यात गोळी झाडून घेतली. गोळीचा आवाज येताच त्यांचे कुटुंबीय, सुरक्षा रक्षक खोलीकडे धावले. रक्तबंबाळ अवस्थेत मनोहरे यांना शहरातील सह्याद्री हॉस्पिटलमध्ये उपचारासाठी दाखल करण्यात आले.
कवटीतून गोळी आरपार निघून गेली
बाबासाहेब मनोहरे यांनी कानशिलावर पिस्तूल ठेवून गोळी झाडली असावी, असा अंदाज उपचार करणाऱ्या डॉक्टरांनी व्यक्त केला. कारण गोळी झाडल्यानंतर ती आरपार निघून गेली, असे डॉ. हणमंत किणीकर म्हणाले. कवटीतून गोळी बाहेर पडली. परंतु गोळी स्पर्शून गेल्याने कवटीच्या हाडाचे तुकडे डोक्यात पसरले. स्कॅन करून हे सर्व तुकडे काढण्यात आले. मेंदूच्या आवरणालाही यामुळे इजा झाली. शस्त्रक्रिया गुंतागुंतीची असली तरी मनोहरे यांची प्रकृती स्थिर असून ते उपचारांना प्रतिसाद देत असल्याचे डॉ. किणीकर यांनी सांगितले. मनोहरे यांना अतिदक्षता विभागात ठेवण्यात आले आहे. पुढील उपचारासाठी त्यांना अन्यत्र हलवण्याची गरज पडली तर तशी तयारी रुग्णालयाने ठेवली असल्याचेही ते म्हणाले.
चौकशीसाठी हॉस्पिटलमध्ये रिघ
मनपा आयुक्त बाबासाहेब मनोहरे यांच्या प्रकृतीची चौकशी करण्यासाठी जिल्हाधिकारी वर्षा ठाकूर, पोलीस अधीक्षक सोमय मुंडे यांच्यासह मनपाचे अधिकारी, शहरातील विविध राजकीय पक्षाच्या पदाधिकाऱ्यांनी हॉस्पिटलमध्ये धाव घेतली.
घटनेबद्दल तर्कवितर्क
बाबासाहेब मनोहरे यांनी आत्महत्येसारखा टोकाचा निर्णय का घेतला असावा याबद्दल तर्कवितर्क लावण्यात येत आहेत. गेल्या अडीच वर्षांपासून मनोहरे हे लातूर मनपाचे आयुक्त असून यापूर्वी त्यांनी धाराशीव, नांदेड या ठिकाणी काम केले आहे. सध्या त्यांच्या बदलीचीही चर्चा सुरू होती.
Comment List