जिवंत व्यक्तीला मयत दाखविले; जामखेडचा ग्रामसेवक निलंबित, नगर जि.प.चे सीईओ येरेकर यांचे आदेश

जिवंत व्यक्तीला मयत दाखवणाऱ्या ग्रामसेवकावर कठोर कारवाई करण्यात यावी, या मागणीसाठी गेल्या तीन दिवसांपासून जामखेड तहसील कार्यालयात उपोषण सुरू होते. आज सकाळी जिल्हा परिषदेचे मुख्य कार्यकारी अधिकारी आशीष येरेकर यांनी दोषी ग्रामसेवक राजेंद्र वळेकर यांच्या निलंबनाचा आदेश काढला. यामुळे तिसऱ्या दिवशी लाभार्थीचा मुलगा भागवत भुजंग जायभाय यांनी आपले उपोषण मागे घेतले.

सीईओ आशीष येरेकर यांनी निलंबनाच्या आदेशात म्हटले आहे की, राजेंद्र बन्सीधर वळेकर, ग्रामपंचायत अधिकारी ग्रामपंचायत साकत, नान्नज, जायभायवाडी (ता. जामखेड) येथे कार्यरत असून, त्यांनी कामकाजात हलगर्जीपणा व कर्तव्यात कसूर केली आहे. त्यांना संधी देऊनही त्यांच्या वर्तनात सुधारणा झाली नाही. जिल्हा परिषद जिल्हा सेवा (वर्तणूक) नियम 1967चा नियम 3चा भंग केलेला आहे. त्यामुळे त्यांना आदेश बजावल्याच्या दिनांकापासून जिल्हा परिषद सेवेतून ग्रामपंचायत अधिकारी या पदावरून सेवा निलंबित करीत आहे. निलंबितकाळात त्यांचे मुख्यालय पंचायत समिती, श्रीगोंदा येथे राहील. सेवा निलंबन कालावधीत देण्यात आलेल्या मुख्यालयाचे गटविकास अधिकारी यांच्या पूर्वपरवानगीशिवाय मुख्यालय सोडता येणार नाही.

दरम्यान, तिसऱ्या दिवशी उपोषण मागे घेतले असले, तरी व दोषी ग्रामसेवकाला निलंबित करण्यात आले असले, तरी यातील दोषी सरपंच व ठरावावर अनुमोदक व सूचक यांच्यावर कठोर कारवाई करण्यात यावी, यासाठी कायदेशीर लढा चालूच ठेवणार, असे उपोषणकर्ते व ग्रामस्थांनी सांगितले.

जामखेड तालुक्यातील जायभायवाडी येथे प्रधानमंत्री आवास (घरकुल) योजनेतील लाभार्थी भुजंग जायभाय हे जिवंत असूनही ग्रामपंचायतीच्या ठरावात ग्रामसेवक राजेंद्र वळेकर व सरपंचांनी मयत दाखवण्याचा प्रताप केला आहे. या प्रकरणातील दोषींवर कडक कारवाई करावी, यासाठी लाभार्थी यांचा मुलगा भागवत भुजंग जायभाय यांनी जामखेड तहसील कार्यालयासमोर दि. 24 मार्च रोजी उपोषण सुरू केले होते. या उपोषणास प्रहार जनशक्ती पक्षाच्या वतीने जिल्हाध्यक्ष विनोदसिंग परदेशी, नय्यूभाई शेख यांनी उपोषणास पाठिंबा दिला होता.