मोदी सरकारच्या काळात अल्पसंख्याकांवरील हिंसाचारात वाढ; अमेरिकेचा अहवाल

अमेरिकेने USCIRF 2025 चा वार्षिक अहवाल प्रसिद्ध केला. त्या अहवालात मोदी सरकारच्या काळात हिंदुस्थानात अल्पसंख्यांकांवरील हिंसाचारत वाढ झाल्याचे नमूद करण्यात आले आहे. लोकसभा निवडणुकीच्या प्रचारादरम्यान भाजपने मुस्लिम आणि इतर धार्मिक अल्पसंख्याकांविरुद्ध द्वेषपूर्ण भाषण केल्याचा आरोपही या अहवालात करण्यात आला आहे. तसेच देशातील गुप्तचर संस्था (रॉ) काही हत्येच्या कटात सहभागी असून रॉवर निर्बंध लादण्याची शिफारस केली आहे. केंद्र सरकारने हा अहवाल फेटाळून लावला आहे.

यूएस कमिशन ऑन इंटरनॅशनल रिलिजियस फ्रीडम (USCIRF) ने अलीकडेच हिंदुस्थानातील अल्पसंख्याकांवरील हल्ले आणि भेदभाव यावर त्यांचा वार्षिक अहवाल प्रसिद्ध केला. अहवालात, आयोगाने भारताच्या गुप्तचर संस्थेवर रॉवर हत्येच्या कटात सहभागी असल्याच्या कथित भूमिकेसाठी बंदी घालण्याची शिफारस केली आहे. 2024 मध्ये भारतात धार्मिक अल्पसंख्याकांवरील हल्ले आणि भेदभाव वाढतच गेल्याचे नमूद केले होते. लोकसभा निवडणुकीच्या प्रचारादरम्यान भाजपने मुस्लिम आणि इतर धार्मिक अल्पसंख्याकांविरुद्ध द्वेषपूर्ण भाषण केल्याचा आरोपही या अहवालात करण्यात आला आहे.

USCIRF ने आपल्या अहवालात हिंदुस्थानची गुप्तचर संस्था रिसर्च अँड अॅनालिसिस विंग (RAW) वर शीख फुटीरतावाद्यांच्या हत्येच्या कटात सहभागी असल्याचा आरोप केला आहे. या आरोपाखाली, USCIRF ने RAW वर बंदी घालण्याची शिफारस केली. अमेरिकन पॅनेलने राष्ट्राध्यक्ष डोनाल्ड ट्रम्प यांना धार्मिक स्वातंत्र्याच्या उल्लंघनासाठी हिंदुस्थानला ‘विशेष चिंतेचा देश’ घोषित करण्याचा सल्ला दिला आहे.

केंद्र सरकारने हा अहवाल फेटाळून लावला आहे. यूएससीआयआरएफचा अहवाल “पक्षपाती आणि राजकीयदृष्ट्या प्रेरित” आहे. तसेच या आयोगाला ‘चिंतेचा विषय’ म्हणून घोषित केले पाहिजे, असे म्हटले आहे.