आई तुळजाभवानी, शिवाजी महाराज यांचा पाळणा म्हणताच अंगावर रोमांच उठले..

अखंड हिंदुस्थानाचे आराध्यदैवत छत्रपती शिवाजी महाराज यांच्या जयंतीच्या निमित्त आयोजित शिवजन्मोत्सव सोहळ्यात क्रांती चौक येथे पाळणा गीतगायन स्पर्धा झाली. यामध्ये महिला मंडळांनी आई तुळजाभवानी आणि छत्रपती शिवाजी महाराज, छत्रपती संभाजी महाराज यांच्या जीवनचरित्रावरील पाळणा म्हणताच प्रत्येकाच्या अंगावर रोमांच उठले आणि अंगातील रक्त सळसळले. शिवसेनेच्या वतीने या स्पर्धेचे आयोजन करण्यात आले होते.

छत्रपती शिवरायांच्या जीवनचरित्रावर आधारित तसेच महाराष्ट्राची कुलस्वामिनी आई तुळजाभवानी व राष्ट्रमाता राजमाता जिजाऊ यांच्या जीवनचरित्रावर आधारितसुद्धा पारंपारिक पाळणे यावेळी विविध संघांनी सादर केले. पाळणा गीत गायन सादरीकरणाच्या वेळेस संपूर्ण क्रांती चौक परिसर शिवरायांच्या स्मरणाने तल्लीन झाला होता. सर्व शिवप्रेमी छत्रपती शिवाजी महाराज यांच्या पाळणा गीतांद्वारे सादर केलेल्या चरित्राने मंत्रमुग्ध झाले होते. सर्वच संघानी आपल्या पाळणा गीतांच्या माध्यमातून शिवरायांचे रोमहर्षक जीवनचरित्र, कर्तृत्व, दातृत्व व नेतृत्व श्रोत्यांच्या नजरेसमोर आणले.

जवाहर कॉलनी येथील आदर्श महिला भजनी मंडळ, विष्णूनगर येथील रामेश्वर भजनी मंडळ, जयभवानीनगर येथील संत तुकाराम महिला भजनी मंडळ, शिवाजीनगर येथील साईबाबा भजनी मंडळ, उत्तमनगर येथील गजानन महाराज भजनी मंडळ, अरिहंतनगर येथील जानकी महिला भजनी मंडळ, जाधववाडी येथील जबरे हनुमान भजनी मंडळ, भानुदासनगर येथील भोलेश्वर महिला भजनी मंडळ, कैलासनगर येथील विठाई भजनी मंडळ, शिवाजीनगर येथील स्वर सुमन भजनी मंडळ, शिवशंकर कॉलनी येथील शिवशक्ती भजनी मंडळ व पुंडलिकनगर येथील कपीश्वर भजनी मंडळ, अशा एकूण १२ संघांनी या स्पर्धेत सहभाग घेतला. तबला वादक म्हणून अशोक जैन तर हार्मोनिम वादक केशव मुळे यांनी सर्व पाळणा गीत स्पर्धा संघास उत्तम साथ दिली. आयोजकांच्या वतीने सर्व पाळणा गीते सादर केलेल्या संघांना मानधन आणि विविध भेटवस्तू देऊन सन्मान करण्यात आला. या स्पर्धेचे सूत्रसंचालन महानगर संघटक सुकन्या भोसले यांनी केले. याप्रसंगी शिवसेना महिला आघाडी जिल्हा संघटक आशा दातार, महानगर संघटक सुकन्या भोसले, उपजिल्हा संघटक सुनंदा खरात, नलिनी बाहेती, विधानसभा संघटक रेणुका जोशी, उपशहर संघटक प्रतिभा राजपूत, छाया देवराज व नुसरत जहाँ उपस्थित होत्या.