ज्ञानेशकुमार देशाचे नवे मुख्य निवडणूक आयुक्त

देशाचे 27वे मुख्य निवडणूक आयुक्त म्हणून ज्ञानेश कुमार यांची नियुक्ती करण्यात आली आहे. 26 जानेवारी 2029 पर्यंत त्यांचा कार्यकाळ असणार आहे. त्याबाबत कायदा मंत्रालयाकडून रात्री उशिरा अधिसूचना जारी करण्यात आली. विद्यमान मुख्य निवडणूक आयुक्त राजीव कुमार हे उद्या निवृत्त होत असून 19 फेब्रुवारी रोजी ज्ञानेश कुमार पदभार स्वीकारणार आहेत.

ज्ञानेश कुमार हे केरळ कॅडरच्या 1988च्या बॅचचे आयएएस अधिकारी आहेत. आज पंतप्रधान नरेंद्र मोदी यांच्या अध्यक्षतेखाली झालेल्या निवड समितीच्या बैठकीनंतर त्यांच्या नावाची घोषणा करण्यात आली. ज्ञानेश कुमार यांची गेल्या वर्षी मार्चमध्ये केंद्रीय निवडणूक आयुक्त म्हणून नियुक्ती करण्यात आली होती.

नवीन मुख्य निवडणूक आयुक्तांच्या नियुक्तीसंदर्भात झालेल्या बैठकीला केंद्रीय गृहमंत्री अमित शहा आणि लोकसभेतील विरोधी पक्षनेते राहुल गांधी उपस्थित होते. या बैठकीत ज्ञानेश कुमार आणि सुखबीर सिंह संधू यांच्यासह पाच नावे ठेवण्यात आली होती. त्याला राहुल गांधी यांनी आक्षेप घेतला. मात्र, बहुमताने ज्ञानेश कुमार यांच्या नावावर शिक्कामोर्तब करण्यात आले. त्यानंतर राष्ट्रपतींकडे हे नाव पाठवण्यात आले.

सरकारला निवडणूक प्रक्रियेवर कंट्रोल हवाय

निवडणूक आयुक्त, मुख्य निवडणूक आयुक्तांच्या निवड समितीतून सरकारने सरन्यायाधीशांना वगळले आहे. त्यामुळे सरकारने स्पष्ट सांगावे, त्यांना निवडणुकांवर कंट्रोल हवाय. त्यांना निवडणूक आयोगाची विश्वासार्हता जपायची नाही, अशा शब्दांत आज काँग्रेसने मोदी सरकारवर जोरदार हल्ला चढवला.

राहुल गांधींचा आक्षेप

बैठकीनंतर राहुल गांधी यानी एक असमहती दर्शवणारे पत्र जारी केले. त्यात त्यांनी आपली भूमिका मांडली आहे. हे प्रकरण न्यायप्रविष्ट असताना ही बैठकच व्हायला नको होती, असे राहुल गांधी पत्रात नमुद केले आहे.