वादग्रस्त न्यायमूर्ती वर्मा यशवंत यांच्या बदली प्रकरणी आज 6 बार असोसिएशनच्या अध्यक्षांनी देशाचे मुख्य न्यायाधीश (CJI) न्यायमूर्ती संजीव खन्ना यांची भेट घेतली. या भेटीनंतर न्यायमूर्ती यशवंत वर्मा यांची बदली मागे घेण्याची मागणी विचारात घेतली जाईल, असे आश्वासन न्यायमूर्ती संजीव खन्ना यांनी बार असोसिएशनच्या अध्यक्षांना दिले, असं वृत्त ‘आज तक’ने दिलं आहे. 14 मार्च रोजी झालेल्या आगीच्या घटनेत दिल्ली उच्च न्यायालयाचे न्यायाधीश यशवंत वर्मा यांच्या निवासस्थानातून मोठ्या प्रमाणात जळालेल्या नोटा सापडल्या होत्या. यानंतर सर्वोच्च न्यायालयाच्या कॉलेजियमने त्यांची दिल्ली उच्च न्यायालयातून अलाहाबाद उच्च न्यायालयात बदली करण्याचा निर्णय घेतला होता. यालाच अलाहाबादसह 6 बार असोसिएशनने विरोध केला आहे.
अलाहाबाद बार असोसिएशनचे प्रमुख अनिल तिवारी म्हणाले की, सरन्यायाधीश संजीव खन्ना यांनी न्यायमूर्ती यशवंत वर्मा यांच्या बदलीच्या आमच्या मागणीवर विचार करण्याचे आश्वासन दिले आहे. दरम्यान, अलाहाबाद बार असोसिएशनने सर्वोच्च न्यायालयाच्या कॉलेजियमच्या निर्णयाचा निषेध केला आणि अनिश्चित काळासाठी संप सुरू केला.
असोसिएशनने म्हटले आहे की, ते न्यायाधीशांवर भ्रष्टाचाराचे आरोप सहन करणार नाही. गुरुवारी सरन्यायाधीशांच्या आश्वासनानंतर, बार संघटनेने संप सुरू ठेवण्याबाबत पुनर्विचार करणार असल्याचं सांगितलं आहे. सरन्यायाधीशांना दिलेल्या निवेदनात, बार संघटनांनी म्हटले आहे की, न्यायव्यवस्थेतून भ्रष्टाचार संपवायला पाहिजे. तसेच 14 मार्चची घटना घडूनही अद्याप एफआयआर का नोंदवला गेला नाही, असा प्रश्नही बार असोसिएशनने उपस्थित केला. जर त्यांच्या मागण्या पूर्ण झाल्या नाहीत तर देशभरातील उच्च न्यायालयांच्या बार असोसिएशन निदर्शने करतील, असे त्यांनी सांगितले.
Comment List