लग्नात वऱ्हाडी म्हणून अचानक घुसला बिबट्या, मंडपात उडाला एकच गोंधळ

लखनऊमध्ये काळजाचा थरकाप उडवणारी घटना घडली आहे. ऐन लग्नसमारंभात बिबट्याने एन्ट्री केल्याने वधू-वरासह वऱ्ह्याड्यांची एकच भंबेरी उडाली. रात्रभर रेस्क्यू ऑपरेशन राबवत वन विभागाने अखेर बिबट्याची सुटका केली आणि वऱ्हाड्यांनी सुटकेचा निःश्वास सोडला.

आलमबागमधील रहिवासी असलेला अक्षय श्रीवास्तवचा लखनऊ शहरातील बुद्धेश्वर रिंगरोडवर असलेल्या एका हॉलमध्ये बुधवारी रात्री विवाहसोहळा सुरू होता. हॉलमध्ये वधू-वर फोटोशूटमध्ये बिझी होते, तर वऱ्हाडी जेवणावर ताव मारत होते. इतक्यात फोटोग्राफरला वरच्या मजल्यावर बिबट्याला पाहिले आणि त्यानंतर हॉलमध्ये एकच गोंधळ उडाला. वधू-वर फोटोशूट सोडून तर वऱ्हाडी जेवणाची ताटं सोडून जीव वाचवण्यासाठी सैरावैरा पळू लागले. लग्नाच्या हॉलमध्ये एकच कल्लोळ माजला.

दरम्यान, बिबट्या हॉलच्या टेरेसवर जाऊन बसला. यानंतर लोकांनी गेस्ट हाऊसचे चॅनेल गेट बंद केले आणि पोलिसांना माहिती दिली. पोलीस आणि वन विभागाने तात्काळ घटनास्थळी धाव घेत रेस्क्यू ऑपरेशन सुरू केले. अखेर रात्रभर अथक प्रयत्न केल्यानंतर बिबट्याला जेरबंद करण्यास वन विभागाला यश आले. रेस्क्यू ऑपरेशन दरम्यान बिबट्याने एका वन अधिकाऱ्याला जखमी केले.