रेल्वे रूळावरून पलीकडे जातांना ट्रक रूळावरच फसलेला असताना तिकडून नांदेडकडे जाणारी तपोवन एक्सप्रेसही जवळ जवळ आली होती, परंतू रेल्वेचालकाने प्रसंगावधान राखत वेळीच रेल्वे रोखल्याने मोठा अपघात टळला. तिकडे रेल्वे येत असल्याचे पाहून ट्रकचालक ट्रक रूळावरच सोडून पसार झाला.रेल्वे पोलिस आणि आरपीएफच्या अधिकार्‍यांनी घटनास्थळी पोहचून सदर ट्रक ट्रेलरच्या सहाय्याने बाजूला करीत वाहतूक सुरळीत केली.
ही घटना परतूर – जालना लोहमार्गावर सारवाडीजवळ आज शुक्रवारी 31 जानेवारी रोजी दुपारी 2.30 ते 3 वाजेच्या सुमारास घडली. तपोवन एक्स्प्रेस जालन्याहून दुपारी 2.30 वाजता निघून नांदेडकडे जात असताना सारवाडीजवळ एका चालकाने ट्रक थेट रेल्वे पटरीवर चढवून रूळाच्या पलीकडे जाण्याचा प्रयत्न केला, परंतू तो ट्रक रूळावरच फसल्याने तो मागे पुढे होत नव्हता, ट्रक बाहेर काढण्याचे चालकाचे प्रयत्न सुरू असतानाच नांदेडकडे जाणारी तपोवन एक्सप्रेस सायरन वाजवत जवळ आली होती, मोठा अनर्थ होईल या भितीपोटी चालकाने ट्रक तसाच रूळावर सोडून पलायन केले. त्याचवेळी रूळावर ट्रक पाहून रेल्वेचालकाने प्रसंगावधान राखत अलिकडेच गाडी थांबवली.
घटनेची माहिती मिळताच आरपीएफचे पोलिस निरीक्षक पवन इंगळे, पोलिस उपनिरीक्षक विजय वाघ, पोकॉ. संदीप जाधव, जीपीएफचे कर्मचार्‍यांनी तात्काळ घटनास्थळाकडे धाव घेतली. पोलीस निरीक्षक इंगळे यांनी समयसूचकता लक्षात घेवून ट्रेलर व अन्य साहित्य मागवून सदर ट्रक महत प्रयत्यानंतर रूळावरून खाली उतरवित गाड्यांचा मार्ग मोकळा केला. या घटनेमुळे सुमारे एक ते दीड तास रेल्वेची वाहतूक ठप्प झाली होती. ट्रक रूळाच्या बाजूला केल्यानंतर तपोवन, नरसापूर व अन्य गाड्या मार्गस्थ झाल्या.
Comment List