Ranji Trophy 2025 – विराट कोहली फेल, दिल्लीच्या कर्णधाराची बॅट तळपली; चौकार अन् षटकारांचा पाऊस

टीम इंडियाचा स्टार फलंदाज विराट कोहली 13 वर्षांनी रणजी करंडक खेळण्यासाठी मैदानात उतरला. त्यामुळे त्याचा खेळ पाहण्यासाठी दिल्लीचे अरुण जेटली स्टेडियम खचाखच भरले होते. परंतु किंग कोहलीची बॅट म्यानातून काही बाहेर आलीच नाही आणि तो अवघ्या 6 या धावसंख्येवर बाद झाला. विराट कोहलीचा वेगवान गोलंदाज हिमांशू सांगवान याने त्रिफळा उडवला. त्यामुळे चाहत्यांचा हिरमोड झाला. परंतु दिल्लीचा कर्णधार आयुष बदोनीने तुफान फटकेबाजी करत चाहत्यांनी मन जिंकली.

विराट कोहलीला चौथ्या क्रमांकावर फलंदाजी करता यावी म्हणून कर्णधार आयुष बदोनीने आपल्या चौथ्या नंबरचा त्याग करत पाचव्या क्रमांकावर फलंदाजी करण्यास उतरला. त्याने मैदानावर येताच आक्रमक फटकेबाजी करत रेल्वेच्या गोलंदाजांचा चांगलाच समाचार घेतला. आयुष बदोनीने पहिल्या डावात 77 चेंडूंमध्ये 12 चौकार आणि 3 षटकारांच्या मदतीने 99 धावा चोपून काढल्या. अवघ्या एक धावेने त्याचे शतक हुकले. त्याला फिरकीपटू कर्ण शर्मा याने बाद केले. कर्णधाराच्या महत्त्वपूर्ण खेळीमुळे दिल्लीच्या संघाने पहिल्या डावात आघाडी घेतली आहे. दुसऱ्या दिवसाअखेर दिल्लीच्या संघाने 93 धावांची आघाडी घेत 334 धावा केल्या आहेत. रेल्वेने आपल्या पहिल्या डावात सर्व गडी बाद 241 धावा केल्या आहेत.