पुण्यानंतर तेलंगणमध्ये आढळला GBS चा पेशंट; महिलेची प्रकृती गंभीर, व्हेंटिलेटवर ठेवलं

पुण्यानंतर आता तेलंगणात गुईलेन बॅरे सिंड्रोम (जीबीएस) चा पहिला रुग्ण आढळला आहे. सिद्धीपेठ येथील 25 वर्षीय महिलेला जीबीएसची लागण झाल्याचे निदान झाले आहे. तिला किम्स रुग्णालयात दाखल करण्यात आले आहे. महिलेची प्रकृती गंभीर असून तिला व्हेंटिलेटर सपोर्टवर ठेवण्यात आले आहे.

कन्सल्टंट न्यूरोलॉजिस्ट डॉ. प्रवीण कुमार यादा यांनी दिलेल्या माहितीनुसार, महिला आणि कुटुंब अलिकडच्या काळात पुण्याला गेलेले नाही. मात्र जीबीएसची लागण तेव्हा होते जेव्हा ताप किंवा अतिसार झाल्यानंतर शरीराची रोगप्रतिकारक प्रणाली स्वतःच्या मज्जासंस्थेवर हल्ला करते. महिलेला सुरुवातीला आठवडाभर दुसऱ्या रुग्णालयात ठेवण्यात आले होते. प्रकृती बिघडल्याने त्यांना किम्स रुग्णालयात दाखल करण्यात आले. मात्र, सध्या त्यांच्यावर व्हेंटिलेटरवर उपचार सुरू आहेत.

आरोग्य विभागाने एका निवेदनात म्हटले आहे की, आतापर्यंत 127 संशयित जीबीएस रुग्ण आढळले असून त्यापैकी नऊ पुणे जिल्ह्याबाहेरचे आहेत. 72 रुग्णांमध्ये जीबीएसची खात्री झाली असून 20 रुग्ण सध्या व्हेंटिलेटरवर आहेत.