राष्ट्रपती द्रौपदी मुर्मू यांच्या अभिभाषणावर ‘त्या थकलेल्या वाटल्या, बिचाऱ्या’ अशी प्रतिक्रिया दिल्यानंतर काँग्रेस नेत्या सोनिया गांधी यांना भाजपच्या नेत्यांनी लक्ष्य केलं आहे. तर सोनिया गांधी यांच्यावर भाजप नेत्यांकडून होणाऱ्या टिकेला काँग्रेस खासदार प्रियंका गांधी यांनी उत्तर दिलं आहे. प्रियंका गांधी म्हणाल्या की सोनिया गांधी आता 78 वर्षांच्या आहे आणि त्यांचा ‘अनादर करण्याचा हेतू नव्हता’.
प्रियंका गांधी यांनी स्पष्ट केलं की, ‘माझी आई 78 वर्षांची महिला आहे; तिने फक्त असं म्हटलं आहे की ‘राष्ट्रपतींनी इतके मोठे भाषण वाचले आणि त्या थकल्या असतील, बिचाऱ्या.’ ती (आई) हिंदुस्थानच्या राष्ट्रपतींचा पूर्ण आदर करते. मला वाटते की माध्यमांनी अशा प्रकारच्या गोष्टीचा विपर्यास केला आहे हे खूप दुर्दैवी आहे. त्या दोघीही आदरणीय व्यक्ती आहेत आणि आपल्यापेक्षा वयाने मोठ्या आहेत. हे स्पष्ट आहे की त्यांचा अनादर करण्याचा हेतू नाही’.
अर्थसंकल्पीय अधिवेशनाच्या पहिल्या दिवशी राष्ट्रपती द्रौपदी मुर्मू यांनी अभिभाषण केले. त्यानंतर सोनिया गांधी यांना पत्रकारांनी प्रतिक्रिया विचारली. तेव्हा, ‘राष्ट्रपती भाषणाच्या शेवटी थकल्यासारख्या वाटल्या, बिचाऱ्या’, असं सोनिया गांधी म्हणाल्या. त्यानंतर भाजपच्या नेत्यांनी सोनिया गांधी यांना लक्ष्य करण्यास सुरुवात केली. हा केवळ राष्ट्रपतींचा नाही तर आदिवासी समाजाचा अवमान असून सर्वांची माफी सोनिया गांधी यांनी मागावी अशी मागणी भाजपच्या नेत्यांकडून करण्यात येत आहे.
पंतप्रधान नरेंद्र मोदी यांनी सोनिया गांधींच्या वक्तव्यावरून काँग्रेसवर टीका केली. ते म्हणाले की, राष्ट्रपती एका गरीब कुटुंबातून येतात पण काँग्रेसच्या राजघराण्यातील लोकांनी ‘त्यांचा अपमान केला’. हा आदिवासी लोकांचा अपमान असल्याचं म्हटलं आहे.
Comment List