दिल्ली विधानसभा निवडणुकीच्या रणधुमाळीत आरोप-प्रत्यारोपांनी वातावरण तापले आहे. आता आम आदमी पार्टीने भाजप उमेदवार प्रवेश यांच्यावर मोठा आरोप केला आहे. प्रवेश वर्मा यांच्या कथित गुंडांनी अरविंद केजरीवाल यांच्यावर हल्ला केला, असा आरोप ‘आप’ने केला आहे. गुंडांची स्थानिक नागरिकांशीही झटापट झाली. नागरीक बचावासाठी पुढे आले आणि कथित गुंडांनी पळ काढला, असे ‘आप’ने म्हटले आहे.
आम आदमी पार्टीने कथित हल्ल्याचा व्हिडिओ आपल्या सोशल मीडिया हँडलवरून शेअर केला आहे. पराभवाच्या भीतीने भाजपा अस्वस्थ झाली आहे. भाजपने आपल्या गुंडांद्वारे अरविंद केजरीवाल यांच्यावर हल्ला घडवून आणला. केजरीवाल यांनी प्रचार करून नये यासाठी प्रवेश वर्मा यांच्या गुंडांनी प्रचारादरम्यान विटा-दगडांनी हल्ला करून त्यांना इजा पोहोचवण्याचा प्रयत्न केला. अशा भ्याड हल्ल्यांनी केजरीवाल घाबरणार नाहीत. दिल्लीची जनता तमुच्या या भ्याड हल्ल्याला उत्तर देईल, असे आम आदमी पार्टीने म्हटले आहे.
दरम्यान, हल्ल्याची माहिती चुकीचे असल्याचे दिल्ली पोलिसांतील सूत्रांनी म्हटले आहे. दोन्ही बाजूंनी घोषणा देण्यात येत होत्या. गोल मार्केटजवळ एकमेकांच्या गाड्या रोखण्याचा प्रयत्न करण्यात आला. पण पोलिसांनी सर्वांना हटवलं. कोणावरही हल्ला झाला नाही, असे पोलीस सूत्रांचे म्हणणे आहे. नवी दिल्ली विधानसभा मतदारसंघातून अरविंद केजरीवाल हे निवडणूक लढवत आहेत. तर भाजपने या मतदारसंघातून माजी खासदार प्रवेश वर्मा यांना रिंगणात उतरवले आहे. तर काँग्रेसचे संदीप दीक्षितही याच मतदारसंघातून निवडणूक लढवत आहेत.
Comment List