अतुल सुभाष आत्महत्याप्रकरण ताजे असतानाच आता गुजरातमध्ये अशीच एक घटना समोर आली आहे. येथील बोटाडमध्ये पत्नीच्या मानसिक त्रासाला कंटाळून एका व्यक्तीने गळफास घेऊन आत्महत्या केली. शिवाय आत्महत्येपूर्वी व्हिडीओ बनवून पत्नीवर गंभीर आरोप करत तिला धडा शिकवण्याचे नातेवाईकांना आवाहन केले आहे. याप्रकरणी गुजरात पोलिसांनी त्याच्या पत्नीविरोधात आत्महत्येस प्रवृत्त केल्याने गुन्हा दाखल केला आहे,
ही घटना गुजरातच्या जमराला गावामध्ये घडली आहे. 39 वर्षीय सुरेश साथदिया याचे लग्न जवळच्याच नवागावात राहणाऱ्या तरुणीशी झाला होता. लग्नाच्या काही वर्षानंतर दोघांमध्ये खटके उडायला लागले. त्याची पत्नी दरवेळी कोणत्या ना कोणत्या गोष्टीवरुन वाद उकरुन माहेरी निघून जायची. तरुणाने वारंवार घरी परतण्यासाठी बोलावूनही ती यायची नाही. यावेळीही ती वाद करुन निघून गेली होती. अनेकदा समाजावूनही ती सासरी परतली नाही. ज्यावेळी सुरेश तिला आणायला सासरी गेला त्यावेळी तिने पुन्हा सासरी येणार नसल्याचे सांगितले. त्यानंतर निराश होऊन सुरेश आपल्या घरी परतला आणि त्याने गळफास घेतला. आत्महत्येपूर्वी त्याने एक व्हिडीओ बनवला. त्यात त्याने पत्नीच्या त्रासाला कंटाळून आत्महत्या केल्याचा आरोप केला आहे. त्याने व्हिडीओत म्हटले की, पत्नीने प्रचंड मानसिक त्रास दिला असून तिच माझ्या आत्महत्येसाठी जबाबदार आहे. शिवाय तिला याची शिक्षा व्हायला हवी असे आवाहनही त्याने नातेवाईकांना केले आहे.
आत्महत्येनंतर सुरेशच्या नातेवाईकांना त्याच्या फोनमध्ये हा व्हिडीओ मिळाला आहे. सुरेशच्या वडिलांनी शुक्रवारी पोलीस स्टेशनमध्ये याबाबत एफआयआर दाखल केली आहे. तक्रारीत त्यांनी सुनेने मुलाचा मानसिक छळ केल्याचा आरोप केला आहे. ते म्हणाले की, सुन वारवार मुलासोबत भांडण करायची आणि माहेरी निघून जायची. मुलगा सासरवाडीला जाऊन सुनेला घ्यायला गेला होता, मात्र तिने घरी परतण्यास नकार दिला, त्यामुळे मुलाने टोकाचे पाऊल उचलले असल्याचा आरोप केला आहे.
Comment List