छत्तीसगडमध्ये नक्षलवादी हल्ल्यात 8 जवान शहीद, स्फोटात चालकाचाही मृत्यू

छत्तीसगडमधील विजापूर जिह्यात नक्षलवाद्यांनी घडवलेल्या आयईडी स्फोटात जिल्हा राखीव सुरक्षा दलाच्या जवानांना घेऊन जाणाऱया वाहनाच्या अक्षरशः चिंधडय़ा झाल्या. या हल्ल्यात 8 जवान शहीद झाले तर एका वाहनचालकाचाही मृत्यू झाला. मृतदेह छिन्नविछिन्न अवस्थेत सापडले. स्फोट इतका शक्तिशाली होता की गाडीचा एक भाग तब्बल 30 फूट उंच झाडावर सापडला. बस्तर रेंजच्या पोलीस महानिरीक्षक सुंदरराज पी यांनी या स्फोटाला दुजोरा दिला आहे.

विजापूरमधील संयुक्त नक्षल प्रतिबंधक मोहिमेनंतर स्कॉर्पियो वाहनातून सर्व जवान परतत होते. दुपारी 2 वाजून 15 मिनिटांच्या सुमारास नक्षलवाद्यांनी आंबेली गावाजवळ कुतरू पोलीस ठाण्याच्या हद्दीत नक्षलवाद्यांनी हा शक्तिशाली स्फोट घडवून आणला. दरम्यान, गेल्या दोन वर्षांतील हा दुसरा सर्वात मोठा हल्ला आहे. हल्लेखोरांनी रस्त्यात आयईडी स्फोटके गाडून ठेवली होती. स्फोटामुळे रस्त्याच्या मध्यभागी तब्बल 10 ते 12 फूट खड्डा पडला. या हल्ल्यानंतरची अनेक दृश्ये सोशल मीडियावर व्हायरल झाली आहेत.

z 26 एप्रिल 2023 रोजी नक्षलवाद्यांनी घडवलेल्या शक्तिशाली स्फोटात तब्बल 10 पोलीस कर्मचारी आणि एका वाहनचालकाचा मृत्यू झाला होता. दंतेवाडा जिह्यातील सुरक्षा कर्मचाऱयांचा ताफा जात असलेले वाहन नक्षलवाद्यांनी आयईडी स्फोट घडवून उडवून दिले होते.