महाराष्ट्राच्या मातीत वाढलेल्या मराठमोळ्या खो-खोने आता आंतरराष्ट्रीय स्तरावर झेप घेतली असून खो-खोचा पहिला वहिला वर्ल्ड कप येत्या 13 ते 19 जानेवारीदरम्यान नवी दिल्लीच्या इंदिरा गांधी स्टेडियमवर रंगणार आहे. या स्पर्धेत पुरुष गटात 20 तर महिला गटात 19 देशांचे संघ आपले कौशल्य दाखवतील.
गेली चार दशकांपासून खो-खोला आंतरराष्ट्रीय स्तरावर मान्यता मिळवून देण्यासाठी राज्यातील खो-खोप्रेमी मेहनत घेत होते. अखेर त्यांच्या प्रयत्नांना यश लाभले असून खो-खोच्या लीगनंतर खो-खोच्या वर्ल्ड कपचाही थरार रंगणार आहे. पुरुषांप्रमाणे महिलांचाही वर्ल्डकप आयोजित केला जाणार असून दोन्ही प्रकारांत संघांची चार गटांत विभागणी करण्यात आली असून पुरुष गटात हिंदुस्थानचा संघ ‘अ’ गटात आहे. या गटात नेपाळसह पेरू, ब्राझील, भूतान या संघांनाही स्थान देण्यात आले आहे. महिलांच्या गटात हिंदुस्थानसह इराण, मलेशिया आणि दक्षिण कोरिया हे संघ खेळणार आहेत.
हिंदुस्थानची सलामी ब्राझीलशी
पुरुष गटात हिंदुस्थानचा सलामीचा सामना 14 जानेवारीला ब्राझीलशी होईल. त्यानंतर 15 जानेवारीला पेरूविरुद्ध तर 16 जानेवारीला भूतानविरुद्ध भिडेल. महिलांच्या गटात हिंदुस्थानी महिला 15 आणि 16 जानेवारीला अनुक्रमे इराण आणि मलेशियन संघाविरुद्ध भिडतील. स्पर्धेच्या प्रत्येक गटातून अव्वल दोन संघ उपांत्यपूर्व फेरीत धडक मारतील. उपांत्यपूर्व फेरीचे सामने 17 जानेवारीला, 18 जानेवारीला उपांत्य फेरीच्या लढती खेळविल्या जातील आणि 19 जानेवारीला अंतिम सामना खेळला जाईल, अशी माहिती वर्ल्ड कप आयोजन समितीचे अध्यक्ष सुधांशु मित्तल यांनी दिली.
खो-खो विश्वचषकाची गटवारी (पुरुष)
- अ गट – हिंदुस्थान, नेपाळ, पेरू, ब्राझील, भूतान
- ब गट – द. आफ्रिका, घाना, अर्जेंटिना, नेदरलॅण्ड्स, इराण
- क गट – बांगलादेश, श्रीलंका, द. कोरिया, अमेरिका, पोलंड
- ड गट – इंग्लंड, जर्मनी, मलेशिया, ऑस्ट्रेलिया, केनिया.
खो-खो विश्वचषकाची गटवारी (महिला)
- अ गट – हिंदुस्थान, मलेशिया, इराण, द. कोरिया.
- ब गट – इंग्लंड, ऑस्ट्रेलिया, केनिया, युगांडा, नेदरलॅण्ड्स.
- क गट – नेपाळ, भूतान, श्रीलंका, जर्मनी, बांगलादेश
- ड गट – द. कोरिया, न्यूझीलंड, पोलंड, पेरू, इंडोनेशिया
Comment List