राज्यात नेहमीच मतदानाच्या टक्केवारीत आघाडीवर राहणाऱ्या कोल्हापूर जिल्ह्याचे मतदान यंदाच्या विधानसभा निवडणुकीत 80 टक्के हून अधिक होण्यासाठी जिल्हा निवडणूक प्रशासनाकडून जनजागृती करण्यात आली. आज सकाळी सात पासूनचच जिल्ह्यातील दहा विधानसभा मतदार संघात 3 हजार 452 मतदान केंद्रावर मतदान प्रक्रिया सुरळीत सुरु झाली. सकाळी नऊ वाजेपर्यंत पहिल्या दोन तासात जिल्ह्यात 7.38 टक्के मतदान झाले होते. तर सर्वाधिक कागल मतदार संघात 8.78 टक्के मतदान झाले होते. सकाळी नऊ नंतर मतदान केंद्रावर मतदानाचा हक्क बजावण्यासाठी मतदारांच्या रांगा लागल्याचे दिसून येत होते.
जिल्ह्यात सुरु असलेल्या मतदानाची विधानसभा मतदार संघानिहाय मतदानाची टक्केवारी सकाळी 9 पर्यंत मिळालेल्या माहितीनुसार अशी, चंदगड -6.78,राधानगरी – 6.67,कागल-8.78, कोल्हापूर दक्षिण-7.25,करवीर-7.76,कोल्हापूर उत्तर -8.25,शाहूवाडी-7.23,हातकणगंले-6.20,इचलकरंजी -7.47 आणि शिरोळ मतदारसंघात 7.53 टक्के मतदान झाले होते.
बीएलओंचा फटका ; मतदार यादीत नाव शोधण्यासाठी राजकीय पक्षांच्या बुथवर मतदारांच्या रांगा
जिल्हा निवडणूक विभागाच्या वतीने प्रत्येक मतदार संघात मतदारांपर्यंत बीएलओ मार्फत मतदान केंद्र आणि खोली क्रमांक याची माहिती असलेल्या मतदान स्लिपचे वाटप करण्यात आले.जिल्हा निवडणूक अधिकारी तथा जिल्हाधिकारी अमोल येडगे यांनी 99 टक्के अशा स्लीप बीएलओ मार्फत मतदारापर्यंत पोहोचविण्यात आल्याचे सांगितले होते.पण प्रत्यक्षात ठिकठिकाणी अशा स्लिप पोहोचल्या नाहीत. काही घरांमध्ये अशा अर्धवट स्लिप पोहोचल्याने,मतदारांना मतदार यादीत नाव शोधण्यासाठी केंद्रा भोवती असलेल्या विविध राजकीय पक्षांच्या बुथ मध्ये आपली नावे शोधावी लागत होती.
Comment List