अमेरिकेचे राष्ट्राध्यक्ष जो बायडन आणि नवनिर्वाचित अध्यक्ष डोनाल्ड ट्रम्प यांची व्हाईट हाऊसमध्ये भेट झाली. या भेटीत दोघांनीही शांततापूर्ण मार्गाने सत्ता सोपवण्याची प्रक्रिया पार पाडण्याबाबत चर्चा केली. बायडन यांनी वेलकम बॅक म्हणत ट्रम्प यांचे स्वागत केले. सत्ता सोपवण्याची ही वेळ संपूर्ण देशासाठी महत्त्वाची आहे, असेही यावेळी बायडन म्हणाले.
ट्रम्प यांची बायडन यांच्यासोबतची ही भेट महत्त्वाची मानली जात आहे, कारण 2020 मध्ये निवडणूक हरल्यानंतर ट्रम्प यांनी सत्ता सोपवण्याशी संबंधित अनेक महत्त्वाच्या परंपरा पाळल्या नव्हत्या. त्यांनी तत्कालीन अध्यक्ष-निर्वाचित जो बायडन यांना व्हाईट हाऊसला भेट देण्यास निमंत्रण नाकारले होते आणि बायडन यांच्या शपथविधी समारंभालाही ते उपस्थित राहिले नव्हते. पण यावेळी ट्रम्प व्हाईट हाऊसमध्ये पोहोचले आणि त्यांनी या परंपरांचे पालन करण्याच्या दिशेने पाऊल टाकले आहे.
दरम्यान, अमेरिकेतील नवीन राष्ट्राध्यक्षांचा शपथविधी सोहळा 20 जानेवारी रोजी वॉशिंग्टन डीसी येथील कॅपिटल बिल्डिंगमध्ये होणार आहे. या विशेष परंपरेनुसार, राष्ट्रपती त्यांच्या निवासस्थानापासून चर्चकडे जातील. ही परंपरा राष्ट्राध्यक्ष फ्रँकलिन डी. रुझवेल्ट यांनी 1933 मध्ये सुरू केली होती.
कॅपिटल इमारतीत प्रवेश करण्यापूर्वी नवीन अध्यक्ष व्हाईट हाऊसमध्ये विद्यमान अध्यक्षांना भेटतात. जिथे औपचारिक चर्चा होते. दरम्यान, 2020 मध्ये जो बायडन यांनी पदाची शपथ घेतली तेव्हा माजी राष्ट्राध्यक्ष डोनाल्ड ट्रम्प रजेवर होते. त्यामुळे ही परंपरा पाळली गेली नव्हती. मात्र बायडन प्रशासन ही परंपरा पाळत आहे.
Comment List