हा बाण बाळासाहेबांचा नाही तर, मोदी शहा यांनी चोरलेला बाण आहे. अशा लोकशाहीला पायदळी तुडवणाऱ्या प्रवृत्तीला ठेचून गाडण्यासाठी जनतेनी आपला स्वाभिमानी बाणा दाखवून द्यावा, असे आवाहन कैलास पाटील यांनी जनतेला केलं. तालुक्यातील खडकी येथे आयोजित सभेत महाविकास आघाडीचे उमेदवार कैलास पाटील बोलत होते. यावेळी त्यांनी थेट भाजप सरकारवर आक्रमक शब्दांत टीका केली.
कैलास पाटील म्हणाले, हिंदुत्ववादी म्हणून गळा काढणाऱ्या भाजपच हिंदुत्व नकली आहे. अन्यथा यांनी हिंदुह्रदयसम्राट बाळासाहेब ठाकरे यांच्या पश्चात त्यांचा पक्ष फोडला नसता, त्यामुळे ज्या चिन्हावर बाळासाहेबांचा निष्ठावंत प्रेम करायचा ते चिन्ह देखील चोरून यांना मतांची भीक मागावी लागत आहे. हा बाण बाळासाहेबांचा नाही तर मोदी शहा यांनी चोरलेला आहे. याचा बदला जनतेने लोकसभेच्या निवडणुकीत घेतला आहे. पण गद्दारी गाडून पुन्हा एकदा महाविकास आघाडी सत्तेत आल्यास उद्धव ठाकरे यांना न्याय मिळणार आहे, असा विश्वास पाटील यांनी व्यक्त केला.
मोठ्या व्यापारी वर्गाला फायदा करून देण्यासाठी भाजप सरकारने सामान्यांच्या जीवनात अडथळे उभे केले आहेत. चॉकलेट, कोका-कोला, पेप्सी यांसारख्या महागड्या वस्तूंच्या किंमतीत वाढ झाली, तरी सामान्यांच्या जीवनावर त्याचा फारसा परिणाम होत नाही. पण या वस्तू तयार करणाऱ्या उद्योगपतींना सवलत देण्यासाठी भाजप सरकारने साखरेच्या निर्यात बंदीचा निर्णय घेतला. यातूनच हे स्पष्ट होते की, भाजपचे धोरण हे मोठ्या व्यापाऱ्यांना सोयीस्कर आहे, तर दुसरीकडे शेतकरी हवालदिल झाले आहेत, अशी टीका पाटील यांनी केली.
शेतकऱ्यांचे हाल आणि भाजपचे अनियंत्रित GST धोरण
शेतकऱ्यांच्या हिताकडे दुर्लक्ष करत भाजपने शेतकरी विरोधी धोरणं राबवली आहेत. शेतकऱ्यांना लागणाऱ्या खतावर 18% GST आहे. ज्यामुळे त्यांना वाढीव खर्च सहन करावा लागत आहे. दुसरीकडे, हेलिकॉप्टरसारख्या आलिशान वस्तूंवर मात्र 5% GST लावला जातो. ट्रॅक्टरसारख्या शेतकरी गरजेच्या वस्तूंवर हा कर अधिक असून भाजप सरकारने शेतकऱ्यांना संपन्न समजून त्यांच्या गरजांना दुर्लक्षित केले आहे. जेव्हा उद्योगपतींच्या 15 लाख कोटी रुपयांचे कर्ज माफ केले जाते, तेव्हा शेतकऱ्यांसाठी मात्र विविध अटी-शर्ती लावून त्यांना कर्जमाफीपासून दूर ठेवले जाते. मोदी सरकारने शेतकऱ्यांच्या कर्जमाफीचा विषय जाणीवपूर्वक दुर्लक्षित ठेवत फक्त आपल्याच आर्थिक फायद्याची सोय केली आहे, अशी जळजळीत टीका कैलास पाटील यांनी केली.
लाडकी बहीण’ नाही, ही ‘लाडकी खुर्ची योजना’
महायुतीच्या ‘लाडकी बहिण योजना’वर देखील कैलास पाटील यांनी तीव्र शब्दांत टीका केली. लोकसभेत भाजपचा पराभव झाल्यानंतर निवडणुकीच्या तोंडावरच ही योजना सुरू करण्यात आली आहे. या योजनेला ‘लाडकी बहीण’ असे नाव दिले असले तरी, ही योजना लाडक्या खुर्चीसाठी तयार करण्यात आली आहे. भाजपने जनतेच्या मतांचा अनादर करत सत्ता गुवाहाटीमार्गे घेतली आणि आता निवडणुकीच्या तोंडावर केवळ मतांसाठी महिला मतदारांना भुलविण्याचे पाऊल उचलले आहे. महागाईने सर्वसामान्यांचे कंबरडे मोडले आहे. गॅस, तेल, जीवनावश्यक वस्तूंचे दर प्रचंड वाढलेले असताना भाजप सरकारच्या ‘लाडकी बहीण योजने’तून काहीही लाभ होणार नाही. योजना केवळ मतांसाठीचा एक पोकळ गाजावाजा आहे, ज्यातून सर्वसामान्य महिलांना दिलासा मिळण्याची शक्यता कमीच आहे, असेही कैलास पाटील म्हणाले.
Comment List